Ndërmarrja shtetërore bullgare e gazit Bulgargaz dhe kompania shtetërore turke e energjisë Botas, nënshkruan një marrëveshje të martën që i jep Bullgarisë akses në terminalet turke LNG për 13 vjet.

Ministri në detyrë bullgar i Energjetikës, Rossen Hristov, i cili mori pjesë në këtë aktivitet, tha se kjo marrëveshje siguron mundësinë e blerjes së gazit nga të gjithë prodhuesit botërorë dhe shkarkimit të tij në Turqi.

Hristov e quajti nënshkrimin një moment historik.

"Gjatë vitit të kaluar, ne patëm probleme serioze me furnizimin me LNG pikërisht për shkak të mungesës së infrastrukturës. Tani, së bashku me kolegët tanë nga Turqia, ne po e zgjidhim këtë problem," shtoi Hristov.

Ministri turk i Energjisë dhe Burimeve Natyrore, Fatih Donmez, i cili gjithashtu mori pjesë në nënshkrim, u shpreh i kënaqur që çështja e diskutuar në Stamboll në dhjetor po kthehet tani në hapa specifikë.

"Sot ne nënshkruam një protokoll që do të zhvillojë bashkëpunimin për gazin natyror midis dy vendeve dhe do të forcojë marrëdhëniet tona," tha Donmez. Ai theksoi se marrëveshja do të përmirësojë sigurinë e furnizimit me gaz natyror në rajonin e Ballkanit. Transferimi vjetor i gazit do të jetë 1.5 miliardë metra kub. Marrëveshja i jep Bullgarisë akses në pesë terminale turke LNG. Kapaciteti, i cili është i përfshirë në dokument, është i disponueshëm dhe mund të rritet, shtoi Donmez./BTA/