Kosova dhe Shqipëria duhet të krijojnë plan-program të posaçëm për shqiptarët e Luginës së Preshevës, thotë kryetari i Këshillit Kombëtar Shqiptar, Enkel Rexhepi. Ai thekson se shqiptarët në Preshevë, Medvegjë e Bujanoc po diskriminohen nga shteti serb, që siç shprehet ai, politikat e Serbisë janë si të kohës së Sllobodan Millosheviqit.

Kryetari i Këshillit Kombëtar Shqiptar vlerëson se çështja e Luginës së Preshevës duhet të jetë prioritet për Kosovën dhe Shqipërinë.

“Qeveria e Kosovës dhe Qeveria e Shqipërisë duhet të krijojnë një plan program të posaçëm për shqiptarët e Luginës së Preshevës, ku ato ulen bashkë dhe diskutojnë për këto çështje dhe ne do të jemi më mirë dhe do të jemi më të fortë në aspektin politik. Prandaj, unë mendoj që Shqipëria duhet t’i bashkëngjitet Kosovës me pjesën e buxhetit dhe të ketë interesim të zhvillohet, arsimi, kultura, bizneset sepse kemi shumë pengesa edhe në çështjen e bizneseve ku shqiptarët e Preshevës detyrohen me fabrikat apo mini-fabrikat e tyre të shkojnë në Shqipëri apo Kosovë për arsye se nuk mund t’i plasojnë produktet e veta”, deklaron Rexhepi.

Pavarësisht përpjekjeve, nxënësit e shkollave fillore dhe të mesme ende nuk e kanë të drejtën të mësojnë në gjuhë shqipe.

“Ne pasivizohemi çdo ditë. Ne diskriminohemi në të drejtat tona. Çështja e librave, teksteve shkollore ende nuk është zgjidhur. Jemi në këtë shekull, në shekullin 21 që ende ne mësojmë me metodën e vjetër, nxënësit e shkollave të mesme ende mësojnë me metodën e vjetër duke shkruar mësimet sepse nuk e kemi të drejtën e librave në gjuhën shqipe. Edhe pse kemi dhënë çdo qartësi, çdo gjë që ne duhet të kryejmë ne i kemi kryer të gjitha obligimet tona. Por çështja është që ju pengon vetëm se janë libra shqip”, shprehet ai.

Shqiptarët që jetojnë në jug të Serbisë - zonën që njihet si Lugina e Preshevës, vazhdojnë të përballen me diskriminim.

Në Preshevë, Medvegjë e Bujanoc, Serbia po vazhdon me “spastrim etnik” përmes pasivizimit të adresave.

Komuna më e prekur, thotë Rexhepi, është Medvegja. Por, në masë të madhe spastrimi etnik po bëhet edhe në Preshevë e Bujanoc.

Për tërë këto shkelje, Rexhepi thotë se është i njoftuar faktori ndërkombëtar, por sipas tij qasjen ndaj Serbisë e kanë të butë.

“Këtë çështje e kemi ngritur edhe me ndërkombëtarët edhe me tjerët, por për momentin është duke hasur tek ndërkombëtarët... janë shumë të butë ndaj Serbisë. Sepse Serbia po shihet qartë nga raportet që është duke ndodhur spastrim etnik si në kohën e Millosheviqit, por me metodat më moderne të cilat janë duke i përdorur në terren”, shprehet ai.

Kryetari i Këshillit Kombëtar Shqiptar, Enkel Rexhepi thotë se Serbia po tenton të pengojë edhe ndihmën e Kosovës për shqiptarët e Luginës së Preshevës.

Në fund të vitit të kaluar, Qeveria ka ndarë më shumë se një milion euro për familjet shqiptare në Preshevë, Medvegjë dhe Bujanoc që merren me bujqësi.

Në kuadër të buxhetit për këtë vit, qeveria ka paraparë që të ndajë katër milionë euro për Luginën e Preshevës. /Sh.Pajaziti

Intervista e plotë në sistemin me parapagim...