Ish-presidenti i Milanit, Silvio Berlusconi është shtrirë në spital pasi gjendja e tij shëndetësore është përkeqësuar.

Spitali “San Raffaele” ka dhënë një përditësim mbi gjendjen e presidentit të Monzas, i cili aktualisht po përballet me pneumoni dhe leuçemi.

Biznesmeni italian 86-vjeçar u dërgua dje në spital me vështirësi në frymëmarrje dhe probleme kardiovaskulare, të cilat u diagnostikuan si pneumoni si pasojë e leuçemisë.

Berlusconi, i cili ka pasur një sërë shqetësimesh shëndetësore vitet e fundit, tani ka filluar një raund të kimioterapisë dhe është në një gjendje të qëndrueshme, përcjellë KosovaPress.

Spitali “San Raffaele” lëshoi ​​një deklaratë sot përmes “ANSA”, ku ka dhënë detaje për gjendjen e Berlusconit.

“Presidenti Silvio Berlusconi është aktualisht në kujdesin intensiv për trajtimin e një infeksioni pulmonar. Ngjarja infektive është pjesë e një gjendjeje hematologjike kronike, bartës i së cilës ai është prej disa kohësh: leucemia mielomonocitare kronike, faza kronike e vazhdueshme e së cilës është konstatuar dhe mungesa e tipareve evolucionare në leuçeminë akute. Strategjia aktuale terapeutike përfshin trajtimin e infeksionit pulmonar, trajtim të specializuar citoreduktiv që synon kufizimin e efekteve negative të hiperleukocitozës patologjike dhe rivendosjen e kushteve klinike para-ekzistuese”, thuhet në njoftimin e spitalit.

Ish- presidenti i Milanit iu nënshtrua një operacioni në zemër në vitin 2016 për të zëvendësuar valvulën e tij të aortës dhe u shtrua në spital javën e kaluar për kontrolle mjekësore, kur u raportua se leuçemia e tij u diagnostikua.

86-vjeçari është ende aktiv në botën e futbollit, pasi e bleu Monzën në vitin 2018. Që nga ardhja e tij, ata kanë fluturuar nga Seria C në Serie A.