BE: Hapja e urës mbi lumin Ibër, çështje e dialogut
Lexohet për: 2 min.
4 muaj më parë
Linku u kopjua
Bashkimi Evropian insiston se hapja e urës mbi lumin Ibër është çështje që duhet shtjelluar në kuadër të dialogut me Serbinë.
Sa i përket paralajmërimeve të zyrtarëve qeveritar të Kosovës se po punohet drejt hapjes së urës mbi lumin Ibër, zëdhënësi i Bashkimit Evropian Peter Stano, në një paraqitje për media ka theksuar se Brukseli asnjëherë nuk i komenton paralajmërimet e veprimeve.
“Asnjëherë nuk spekulojmë me skenarë "po sikur", qëndrimi ynë i përgjithshëm është se marrëveshjet e arritura në kuadër të dialogut duhet të zbatohen, ky është një detyrim i kahershëm për të dyja palët. Dhe çfarëdo hapash dhe veprimesh që do të ndërmerren që kanë ndikim në njërën ose tjetrën anë, duhet të zgjidhen, diskutohen dhe çohen përpara në kuadrin e dialogut të lehtësuar nga BE”, ka deklaruar Stano.
Revitalizimi i urës së Ibrit ishte paraparë në marrëveshjen për lirinë e lëvizjes, të arritur mes Kosovës dhe Serbisë më 2015 në Bruksel. Edhe pse 6 vjet më parë kanë përfunduar punimet me investime milionëshe të BE-së, ura vazhdon të jetë e mbyllur për veturat.
