Dhjetë vite pasi nuk kishte luajtur asnjë ndeshje kualifikuese, Kosova gjendet sot përballë momentit më historik në futbollin e saj, duke qenë vetëm “90 minuta larg kualifikimit për finalet e kësaj vere”.

Sipas raportimit të BBC Sport, kombi që u njoh nga FIFA dhe UEFA vetëm në vitin 2016, do të presë Turqinë në një stadium "Fadil Vokrri" të stërmbushur. Trajneri Franco Foda ka përshkruar një gjendje euforie totale, duke vënë në dukje se “kemi një stadium për vetëm 13,000 spektatorë, por po të ishte e mundur, do të ishin 100,000”, ndërsa ka kërkuar qetësi për të përmbushur këtë mision që dikur dukej i pamundur.

Për shumë vëzhgues, pesha e kësaj ndeshjeje tejkalon sportin, duke u renditur krahas momenteve kyçe të shtetformimit.

Komentatori Arben Berisha tha për BBC se kjo mund të konsiderohet si “dita e tretë më e rëndësishme në historinë e Kosovës”, pas çlirimit në vitin 1999 dhe shpalljes së pavarësisë në 2008.

Ky rrugëtim i jashtëzakonshëm, që nisi me një barazim 0-0 ndaj Haitit 12 vite më parë, ka kulmuar me një ekip që tani mposht Suedinë e Sllovakinë dhe kërkon biletën për në grupin D të Botërorit, ku do të përballej me yjet e SHBA-së dhe Australisë.

Emocionet janë të forta edhe për veteranët si ish-kapiteni Anel Rashkaj, i cili kujtoi se në fillimet e tyre “nuk kishim para për të organizuar kampe apo hotele” dhe gjithçka financohej nga diaspora.

Sot, me yje si Vedat Muriqi dhe Edon Zhegrova në fushë, Kosova nuk është më një autsajder, por një skuadër që ka bërë kombin të ndihet “krenar që njerëzit e shohin se kosovarët kanë shumë për të kontribuar në botë”.

Nëse sonte arrihet fitorja, pritet që rrugët e Prishtinës të dëshmojnë “festimin më të madh të parë ndonjëherë” në historinë e vendit.

KosovaPress