Derisa Federata e Futbollit të Kosovës tashmë është në kërkim të një trajneri të ri për kombëtaren pas largimit të Primoz Glihas, një kandidaturë e ofruar është ajo e Tahir Batatinës.

Trajneri i Llapit në një intervistë për KosovaPress, ka thënë se nëse i besohet kjo detyrë, ai do të punon që Kosova të ndjekë rrugën e Kroacisë, shtet ky që sot është ndër më të fuqishmet ën botën e futbollit.

“Nuk i frikësohem fare kombëtares, jam në gjendje ta marrë kombëtaren dhe të sjellë diçka risi siç ka sjellë Dalici te kombëtarja e Kroacisë, sepse Dalici të njëjtën gjë e ka bërë të Kroacia, shikoni ku është sot Kroacia. Por mendoj, atë që kam kërkuar që në momentin që Batatina do të vije në kombëtare do të jenë disa kritere të cilat ne do t’i aplikojmë para se të vijmë me një staf shumë profesional, menaxhues dhe me kritere shumë të qarta rreth kombëtares. Por këta djem duhet një energji pozitive ta marr dhe ta rikthej kombëtaren në nivelin më të lartë të mundshme duke e ditur se ka rënë niveli i kombëtares dhe djemve ne motivim. Një motivim dhe organizim i tillë e ndihmon kombëtaren tonë që t’i arrijmë objektivat prapë dhe të jemi konkurrues edhe në botëror edhe në evropian.”, tha Batatina.

Ai ka shtuar se po kërkon timonin e Dardanëve për t’i rikthyer ata në rrugën e suksesit dhe për të treguar vlerat e tij si trajner.

Batatina ka zbuluar se ende nuk është kontaktuar nga drejtuesit e FFK-së, derisa ka apeluar që assesi të mos emërohet sërish trajner i huaj në krye të Kosovës.

Madje, Batatina garanton që do të ishte edhe faktor i rikthimit të harmonisë dhe besimit brenda kombëtares dhe që do t’i bënte lojtarët që të vdesin në fushën e lojës për Kosovën.

Në planin e tij, Batatina ka bërë të ditur se parasheh që gjysma e lojtarëve të ftuar nga ai në kombëtare do të ishin nga Superliga e Kosovës.

“Të garantojë që 50/50, automatikisht 50 përqind do të jenë të Superligës së Kosovës, 50 përqind do të jenë lojtarët të cilët kanë formë optimale nëpër skuadrat e tyre. Ata lojtarë që kanë formën optimale në Superligën e Kosovës iu garantoj për çdo skuadër, Dritës, Gjilanit, Prishtinës, Llapit, Ballkanit të gjitha skuadrave do t’i angazhojë te kombëtarja dhe iu garantoj që me ata djemë që do t’i angazhojnë nga Superliga e Kosovës bashkarisht me yjet që i kemi si Amir Rrahmanin, Muriqin, Zhegrovën që nuk duhet fare të mendohet ndryshe pa këta djemë të cilët janë top lojtarë, që kanë dalë nga liga e Kosovës dhe më këta djemë do të bëhet një kombëtare e cila ndoshta do të jemi befasi edhe e botërorit edhe e evropianit”, ka thënë në fund Batatina.

Ai gjithashtu shtoi se nëse do t’i besohej detyra e trajnerit të kombëtares, nuk do të ishte krye të Llapit pasi do t’i përkushtohej me orar të plotë punës me Dardanët