Kampioni i Kosovës në futboll, Ballkani e ka konfirmuar largimin e Edvin Kuc dhe Armend Thaqit nga klubi.

Thaqi pritet të kalojë te skuadra rumune Cluj, kurse Kuc pritet t’i bashkohet skuadrës nga Azerbajxhani, Baku Neftchi, raporton KosovaPress.

Ballkani në “Facebook” falënderoi dyshen në fjalë për kontributin e dhënë dhe sakrificat për skuadrën dhe fanellën që e bartën.

“Kanë zbritur në fushë për qindra ndeshje!

Në secilën prej tyre veç e veç, u paraqitën me motiv e përkushtim të  jashtëzakonshëm, duke dhënë shembullin tipik se si duhet sakrifikuar për skuadrën dhe fanellën që bartën. Atë e djersitën me vetëmohim në çdo minutë të betejave futbollistike, e jo rrallë edhe të gjakosur nuk u dorëzuan, duke vazhduar të luftojnë për qëllimet dhe objektivat e klubit. Ta kesh një kalibër të futbollistit të tillë për ta udhëhequr skuadrën, do të thotë shumë, kurse ne ishim edhe më me fat, pasi dy liderë të tillë i kishim në fushë.

Edvin Kuç dhe Armend Thaqi janë modeli që do t’u shërbejë gjeneratave, janë kulminacioni i profesionistëve sportiv, definicioni i vërtetë i titullit kapiten! Të gjitha sukseset tona historike, janë të lidhura ngusht me kontributin e çmuar dhe të pa harruar të dy yjeve tanë. Ata do të mbetën përjetësisht kapitenët unik, që si të tillë motivuan bashkëlojtarët e tyre edhe në momente prej më të vështirave, e prijës të tyre ishin edhe në rrugën drejt glorifikimit. Faleminderit legjenda të FC Ballkanit, ky klub do mbetet shtëpia juaj e përhershme, ku ju presim sërish!”, shkruante në njoftimin e Ballkanit.