Asllan Selimi sjell ditar për torturat e shtetit serb ndaj shqiptarëve
Lexohet për: 2 min.
1 vit më parë
Linku u kopjua
"Tmerri ka emër", është libri i cili u promovua nga ish i burgosuri politik, Asllan Selimi. Ky ditar historik ka kujtime nga lufta, burgu, gjykimi, dënimi dhe masakra në burgun e Dubravës.
Në promovimin e librit nga Shoqata e të Burgosurve Politik të Kosovës, u tha se i njëjti është kontribut për dokumentimin e mizorive ndaj shqiptarëve në burgjet serbe.
Ditari i Asllanit u kërkua që të ketë vend edhe në sirtarët e bibliotekave shkollore.
Në emër të familjes, Ramadan Selimi falenderoi të gjithë ata që kanë ndihmuar në promovimin e këtij libri.
Ish-i burgosuri politik, Hydajet Hyseni, lexoi një letër të dërguar nga kryeministri Albin Kurti, në të cilën u tha se më shumë se kurrë nevojitet ky format i librit për të dëshmuar të vërtetën mbi vuajtjet dhe sakrificat e idealistëve.
“Libri ‘Tmerri ka emër’ i autorit, të ish-burgosurit politik dhe të mbijetuarit të masakrës së Dubravës, Asllan Selimi është dëshmi autentike e radhës e cila na rikthen memorien tonë kolektive të atyre viteve që nuk guxojnë të harrohen. Përmes këtij libri, shoku ynë i burgjeve Asllan Selimi sjell përjetimet jo vetëm të tij, por të gjithë të burgosurve të shumtë që patën fatin të përjetojnë ankthet e tmerrit në burgjet serbe", u tha në letrën e Kurtit.
Edhe ish i burgosuri politik, Nait Hasani, tha se Asllani në librin e tij ka përshkruar torturat çnjerëzore dhe sakrificën e qëndresën e pathyeshme të shqiptarëve.
Ish-gjenerali Kudusi Lama theksoi se është i befasuar me përshkrimin që ka bërë Asllani në këtë libër.
“Unë në procesin e leximit të librit, shumë herë e kam gjetur vetën me rrahje të shpeshta të zemrës, është e jashtëzakonshme”, tha ai.
Ndërsa redaktori i këtij libri, Lan Qyqalla, tha se ky libër duhet të ketë vend në sirtarët e bibliotekave të shkollave.
Libri “Tmerri ka emër” është mbështetur nga Ministria e Kulturës, Rinisë dhe Sportit.
