Një person është arrestuar në Fushë Kosovë nën dyshimin për tentim vrasje pas një mosmarrëveshjeje që përfundoi me të shtëna me armë.

Policia bëri të ditur se rasti ka ndodhur më 12 mars rreth orës 16:25. I dyshuari dhe viktima, të dy meshkuj kosovarë, fillimisht janë përleshur fizikisht, ndërsa më pas i dyshuari ka qëlluar me armë në drejtim të viktimës, transmeton KosovaPress.

Në vendin e ngjarjes policia ka konfiskuar një pistoletë me gaz, një karikator, 10 fishekë me gaz dhe tri gëzhoja, ndërsa nga çanta e të dyshuarit janë gjetur edhe 10 fishekë të tjerë. Me vendim të prokurorit, i dyshuari është dërguar në mbajtje.