Një ari i shpëtuar nga lufta në Ukrainë dhe i strehuar në kopshtin zoologjik West Lothian ka ngordhur.

Stafi në kopshtin zoologjik tha se ishin "plotësisht të shkatërruar" që Yampil kishte ngordhur pas një procedure anestezie.

Ariu i zi aziatik 12-vjeçar ishte ri-strehuar në kopshtin zoologjik në janar, pasi u shpëtua nga fshati Yampil në Donetsk të Ukrainës lindore.

Ushtarët ukrainas kishin zbuluar një kopsht zoologjik të braktisur në fshat kur mbërritën në korrik 2022, pesë muaj pas pushtimit rus. Ata gjetën Yampil të plagosur pas granatimeve ruse. Nga gati 200 kafshë në kopshtin zoologjik, ai ishte një nga shtatë të mbijetuarit.

Ekipet e shpëtimit fillimisht e zhvendosën në një strehë kafshësh në Belgjikë përpara se të strehohej përgjithmonë në Skoci.

Romain Pizzi, një veteriner specialist, tha se Yampil kishte qenë "rehat dhe i lumtur" në West Lothian. Megjithatë, ai tha se kafshët që ishin shpëtuar nga "rrethana të tilla traumatike" mund të kishin "probleme të ndërlikuara shëndetësore si problemet dentare ose çrregullimet e stresit post-traumatik.

“Yampil u anestezua për trajtim të mëtejshëm për problemet e tij shëndetësore që shqetësonin ekipin. Mjerisht, anestezimi i kafshëve mbart gjithmonë rreziqe dhe Yampil nuk u shërua nga procedura," shtoi ai.

Ariu po vëzhgohej për shenja të PTSD kur mbërriti në kopshtin zoologjik pasi u trondit nga zjarri i predhave në zonën e luftës.

Ariu i zi aziatik, i njohur si arinjtë e hënës për shkak të gëzofit të verdhë në formë gjysmëhëne në gjoks, klasifikohen si specie e rrezikuar, me vlerësime që sugjerojnë se kanë mbetur më pak se 60 mijë prej tyre në botë. Ata janë arinj me përmasa mesatare me lartësi 137-165 cm dhe peshojnë 90-115 kg. /BBC