Përballja mes Anglisë dhe Argjentinës në gjysmëfinalen e Botërorit 2026 në Atlanta nuk është thjesht një ndeshje futbolli, por kapitulli i radhës i një prej rivaliteteve më të ashpra në historinë e sportit.

Ky takim i parë mes dy kombëtareve pas 21 vitesh sjell sërish në skenë një tension të vjetër që përzien sportin me politikën, duke pasur në sfond luftën e vitit 1982 për ishujt e kontestuar në Atlantikun e Jugut.

Gjithçka nisi në çerekfinalen e vitit 1966, kur trajneri anglez Alf Ramsey i quajti lojtarët argjentinas "kafshë" pas një ndeshjeje tejet të ashpër, ku kapiteni argjentinas Antonio Rattin refuzoi të largohej nga fusha pas kartonit të kuq dhe u ul në shenjë proteste mbi tepihun e kuq të rezervuar për Mbretëreshën Elizabeth II.

Kulmi i këtij armiqësie u arrit në vitin 1986, kur Diego Maradona shënoi golin e famshëm me dorë ("Dora e Zotit") dhe vetëm katër minuta më vonë realizoi "golin e shekullit" pasi dribloi gjysmën e skuadrës angleze.

Ky rivalitet u pasurua edhe në vitin 1998 me kartonin e kuq dramatik të David Beckham-it pasi u provokua nga Diego Simeone, përpara se Beckham të merrte shpagimin e tij në vitin 2002 duke shënuar penalltinë e fitores.

Se sa i gjallë dhe i çuditshëm mbetet ky rivalitet edhe sot, e tregon më së miri një incident i fundit: ish-mbrojtësi argjentinas Oscar Ruggeri mori në video-thirrje ish-lojtarin e Anglisë, Gary Stevens, live në një emision televiziv duke i kërkuar t'ia kthente fanellën që kishin shkëmbyer në vitin 1986 dhe duke i bërtitur: "Na ktheni ishujt!".

Megjithatë, jashtë fushës sot ka më shumë diplomaci; Beckham dhe Simeone janë pajtuar e madje kanë shkrepur foto së bashku kohët e fundit.

Por sapo të bjerë bilbili i fillimit në Atlanta, i gjithë ky respekt diplomatik do t'i lihet vendit një beteje të zjarrtë për një biletë në finalen e madhe të Botërorit.

KosovaPress