Shtetet e Bashkuara nuk duhet të përjashtojnë qeveritë e Ukrainës dhe ato evropiane nga bisedimet e paqes me Rusinë, tha ambasadori gjerman në Londër Miguel Berger.

Berger theksoi se ngjarjet e fundit kanë treguar se Gjermania bëri një gabim kur reduktoi investimet në mbrojtje pas Luftës së Ftohtë.

"Ka një ndjenjë që Shtetet e Bashkuara janë dorëzuar shumë herët në disa çështje kyçe, të tilla si refuzimi i anëtarësimit të Ukrainës në NATO dhe përjashtimi i mundësisë së dërgimit të trupave amerikane në Ukrainë - dhe këto duhet të kishin qenë atu të rëndësishme negociuese", tha ai për BBC.

Berger shtoi se është e nevojshme të harmonizohen qëndrimet e të gjitha palëve të përfshira.

"Ne duhet të kemi një plan të përbashkët. Presidenti ukrainas Volodymyr Zelensky ka kërkuar pikërisht këtë. Ne nuk mund të hyjmë në negociata pa një plan të koordinuar ukrainas-evropian-amerikan për atë që do t'i kërkojmë Rusisë në mënyrë që të arrihet një marrëveshje e qëndrueshme paqeje", tha ai.

Ambasadori Berger kujtoi paralajmërimet që erdhën shumë vite më parë nga Rusia.

"Në vitin 2007, Putin mbajti një fjalim në të cilin ai e bëri të qartë se ai po ndryshonte drejtimin e politikës së tij. Ne duhet të kishim filluar të investonim më shumë në mbrojtjen tonë në atë kohë."