Kryetari i Bashkimit Demokratik për Integrim (BDI), Ali Ahmeti, ka reaguar ashpër ndaj deklaratës së ministres serbe Snezhana Paunoviq, e cila në një intervistë për Kurir, dy ditë më parë, tha se po të ishte në vend të ish-presidentit serb Sllobodan Millosheviq, do ta kishte kryer spastrimin etnik të shqiptarëve në Kosovë në vitin 1998.

Njëri nga politikanët kryesorë shqiptarë në Maqedoninë e Veriut në 25 vjetët e fundit, e cilësoi këtë deklaratë si tronditëse, çnjerëzore dhe të papranueshme.

“Një deklaratë e tillë nuk është vetëm fyerje për viktimat e luftës, por edhe pasqyrim i një mentaliteti që frymëzohet nga politika kriminale e mentorit të saj politik, Sllobodan Millosheviqit, i cili përfundoi duke u përballur me drejtësinë ndërkombëtare për krimet e regjimit të tij”, ka thënë Ahmeti, sipas një njoftimi të BDI-së, transmeton KosovaPress.

Sipas tij, të flasësh sot për spastrim etnik si alternativë politike, pas masakrave, varrezave masive dhe krimeve të dokumentuara në Kosovë, është dëshmi e një mendësie të rrezikshme dhe të papajtueshme me vlerat njerëzore, demokratike dhe evropiane.

“Mohimi ose glorifikimi i politikave gjenocidale nuk mund të ketë vend në shekullin XXI”, theksoi ai.

Ahmeti shtoi se historia tashmë ka dhënë verdiktin e saj ndaj politikave të tilla dhe kujtoi se përballë këtij mentaliteti u ngrit rezistenca e popullit të Kosovës, e kurorëzuar me Ushtrinë Çlirimtare të Kosovës, njëri nga themeluesit dhe udhëheqësit e së cilës ishte edhe vetë ai.

“Në krah të aleatëve tanë ndërkombëtarë, UÇK-ja solli lirinë dhe çlirimin e Kosovës. Ata që edhe sot ëndërrojnë spastrim etnik duhet ta dinë se ideologjitë e urrejtjes gjithmonë përfundojnë në bankën e historisë, ndërsa liria dhe e drejta triumfojnë”, përfundoi Ahmeti. /KosovaPress/

/Kosovapress/