Ministri i Financave Hekuran Murati ka reaguar ndaj Lidhjes Demokratike të Kosovës në lidhje akuzat për humbjet në Trust, duke thënë se deklarimet e kësaj partie kanë qenë fushatë dezinformimi dhe se njohuritë e tyre janë të mjaftueshme sa për të llogaritur kusurin, por “jo për gjëra më të thella.”

“Facebook ma kujtoi që në këtë kohë para një viti, Lumir Abdixhiku e Avdullah Hoti patën filluar një fushatë dezinformimi, siç rëndom bëjnë për pothuajse të gjitha temat, në lidhje me kursimet e Trustit dhe performancën e investimeve. Sipas logjikës së Abdixhikut e Hotit, Trusti do të duhej t’i kishte humbur 180 milionë euro deri më sot, për një vit. Por ja që koha, bashkë me performancën e investimeve në Trust, e tregon edhe njëherë se njohuritë e ekonomistëve të LDK-së janë të mjaftueshme vetëm sa për të llogaritur se sa duhet kthyer kusuri, por jo për gjëra më të thella,” ka shkruar Murati në Facebook.

Murati krahas reagimit të tij, ka postuar edhe deklaratën e Abdixhikut një vit më parë mbi Trustin Pensional të Kosovës, ku Qeveria Kurti akuzohej se “ka rënë gjumë, ndërkohë që humbjet në Trust çdo ditë janë 500 mijë euro”. “Përderisa kursimet pensionale, të fituara me shumë mund, humbasin vlerë nga gjysmë milion euro në ditë, popullistët vazhdojnë rehatinë. Plot 36 milionë euro është zhvlerësimi i fondeve nga janari deri më sot. Qeveria nuk gjen as brengën e as kohën të caktojë një bord,” kishte shkruar Abdixhiku një vit më parë.

•