Pesë ditë para mbajtjes së zgjedhjeve nacionale në Kosovë, Agjencia për Informim dhe Privatësi (AIP) u ka bërë thirrje partive dhe subjekteve politike që të respektojnë privatësinë dhe të mbrojnë të dhënat personale të qytetarëve gjatë procesit zgjedhor të 7 qershorit.

Në një njoftim për media, AIP thekson se ruajtja e integritetit zgjedhor kërkon respektim të plotë të të drejtave të qytetarëve në raport me përpunimin e të dhënave personale.

Agjencia kërkon që partitë dhe subjektet politike të sigurojnë që çdo përpunim i të dhënave personale të bëhet mbi baza të ligjshme, përfshirë pëlqimin e qytetarëve, interesin legjitim të subjektit politik ose arsye të tjera të përcaktuara me ligj.

Po ashtu, AIP kërkon që të mos përdoren të dhënat kontaktuese të qytetarëve, të mbledhura gjatë ushtrimit të funksioneve publike apo në forma të tjera, për qëllime të marketingut politik.

Sipas Agjencisë, subjektet politike duhet të shmangin ekspozimin e të dhënave personale gjatë komunikimit përmes postës elektronike, mesazheve telefonike apo thirrjeve telefonike pa pëlqimin paraprak të qytetarëve.

Në thirrjen e saj, AIP rikujton edhe detyrimin për respektimin e të drejtës së qytetarëve që në çdo kohë të kundërshtojnë përdorimin e të dhënave të tyre për marketing të drejtpërdrejtë, duke kërkuar ndërprerjen e menjëhershme të komunikimit pas paraqitjes së kundërshtimit.

Agjencia gjithashtu u bën thirrje partive të shmangin çdo formë të profilizimit ose përpunimit masiv të të dhënave të ndjeshme, përveç rasteve kur ekziston bazë e qartë ligjore dhe janë ndërmarrë masat e nevojshme mbrojtëse.

Ndërkohë, AIP kërkon transparencë të plotë ndaj qytetarëve për mënyrën e përpunimit të të dhënave personale, përmes publikimit të politikave të qarta dhe të qasshme të privatësisë.

Agjencia për Informim dhe Privatësi thekson se partitë dhe subjektet politike duhet të sigurojnë mbrojtjen e të dhënave personale të qytetarëve të Republikës së Kosovës në përputhje me kërkesat ligjore.

/Kosovapress/