Kosova ka stagnuar në të gjitha nivelet pasi s’ka pasur asnjë projekt zhvillimor në ekonomi, shëndetësi e arsim, vlerësojnë opozitarët dhe analistët politikë. Sipas tyre, kryeministri Albin Kurti, i cili është në përfundim të mandatit qeverisës, ka dëmtuar edhe marrëdhëniet me aleatët ndërkombëtarë. Qeveria e Kosovës nuk iu përgjigj këtyre kritikave veçse në mbledhjen e fundit me kabinetin e tij, Kurti u mburr për punën 4-vjeçare.
Deputeti i Partisë Demokratike të Kosovës, Hajdar Beqa, thotë për KosovaPress se kryeministri Kurti nuk ka përmbushur premtimet e dhëna.
Sipas tij, kjo qeveri është “më e dobëta që ka pasur Kosova që nga paslufta”.
Kritika ka edhe nënkryetari i Lidhjes Demokratike të Kosovës, Lutfi Haziri.
Sipas tij, qeveria Kurti do të mbahet mend për “korrupsion masiv”. Ai përmend sanksionet e Bashkimit Evropian ndaj Kosovës, “dëmtimin e raporteve me SHBA-të” dhe atyre ndërshqiptare.
Në anën tjetër, analisti politik, Albinot Maloku, thotë për KosovaPress se kryeministri Albin Kurti s’ka arritur ta stabilizojë gjendjen ekonomike dhe t’i realizojë premtimet e dhëna gjatë vitit 2021, përkundër shumicës absolute në Kuvendin e Kosovës.
Por, të kundërtën e tha kryeministri Albin Kurti i cili në mbledhjen e fundit të qeverisë për vitin 2024, listoi dhjetë “arritjet kryesore” të ekzekutivit.
Liberalizimi i vizave për Kosovën, njohja e pasaportës së Kosovës prej dy shteteve mosnjohëse si Spanja dhe Armenia, u konsideruan si sukseset e para të qeverisë së Kosovës për vitin 2024.
Tutje, kryeministri Albin Kurti tha se edhe regjistrimi dhe inkasimi i energjisë elektrike në katër komunat veriore të vendit ndodhi këtë vit për herë të parë që nga paslufta.
