Qyteti Bend në Oregon, u ka kërkuar qytetarëve të ndalojnë vënien e syve plastikë mbi skulpturat e qytetit.

Faqja zyrtare e qytetit në Instagram njoftoi se sytë plastikë, të cilët shakaxhinj të panjohur ia ngjitën tetë instalacioneve të artit publik, mund t'i kushtojnë shtrenjtë buxhetit të qytetit.

"Edhe pse sytë plastikë të vendosur në vepra të ndryshme arti në të gjithë qytetin mund t'ju bëjnë të qeshni, heqja e kujdesshme e tyre kushton para. Ne nuk na shqetësojnë kurora, gjerdan dhe kapele Krishtlindjesh, por le të shmangim ngjitësit, grafitët dhe çdo gjë që mund të dëmtojë veprën e artit."

Postimi tërhoqi dhjetëra komente nga banorët, duke përfshirë shumë që mendonin se sytë plastikë ishin një shtesë e padëmshme për skulpturat.

Zëdhënësja e qytetit René Mitchell tha se ngjitësit që mbajnë sytë në vend mund të dëmtojnë veshjen metalike.

“Çeliku mund të humbasë patinën e tij nga ngjitësi dhe më pas ka nevojë për një trajtim kimik për ta bërë atë të ndryshket përsëri në mënyrë të barabartë”, tha Mitchell për OregonLive. "Llojet e tjera të çelikut kërkojnë tretës të fortë për të hequr mbetjet ngjitëse".

Mitchell tha gjithashtu se qyteti ka shpenzuar tashmë mbi 1500 dollarë për të hequr sytë plastikë nga skulpturat.

"Ndërsa shtimi i syve plastikë mund të jetë argëtues dhe t'i bëjë njerëzit të qeshin, ai përfundon duke shkaktuar dëme të padëshiruara," paralajmëron ajo.

•