Në kuadër të aktiviteteve të 16 Ditëve të Aktivizmit, sot u shfaq filmi dokumentar Nice Ladies (Zonjat e Mira), kushtuar rezistencës së grave gjatë luftës në Ukrainë si pasojë e agresionit të pajustifikueshëm ushtarak të Rusisë.

Në hapje të këtij eventi të organizuar nga Qendra Kosovare për Studime Gjinore,  drejtoresha e kësaj qendre Luljeta Demolli tha se si organizatë solidarizohen dhe mbështesin gratë e Ukrainës në kauzën e tyre.

“Filmi ka një tematikë që është pozicion yni si organizatë që mbështet gratë e Ukrainës për kauzën e tyre. Kemi gjetur 16 Ditë e Aktivizmit që ta shfaqim këtë film”, tha Demolli.

Ambasadorja e Holandës në Prishtinë, Karin Boven, tha se ky film reflekton luftën dhe ndikimin e saj në jetën e grave të Ukrainës.

“Të drejtat e njeriut janë baza e demokracisë. Do ta shohim këtë dokumentar me luftën dhe lidhjen e pathyeshme të këtyre nxitëse të tifozëve. Ky film reflekton luftën në Ukrainë që ndikon në jetën e tyre”, tha Boven.

Pas shfaqjes së filmit dokumentar u mbajt edhe një panel diskutimi. Ish-ambasadorja e Kosovës në Hungari, Luljeta Vuniqi, ka folur mbi ngjashmëritë e skenave të luftës aktuale në Ukrainë me atë të luftës para 25 vjetësh në Kosovë.

“Në shumëçka gjej veten e shumë njerëz të Kosovës që kemi përjetuar situata të ngjashme. Një rrëfim prekës, por në të njëjtën kohe edhe inkurajues dhe fuqizues. Edhe pse luftë, edhe pse pasiguri, frikë, dhimbje të gjitha çka mund të them për luftën dhe pasojat e saj, ato treguan shpirtin e lirë, si dhe rezistuan për të luftuar për lirinë”, u shpreh Vuniqi.

Regjisorja Blerta Zeqiri tha se rezistenca e grave gjatë luftës në Kosovë është shfaqur dhe dokumentuar shumë pak.

“Është një film shumë prekës, i punuar shumë bukur dhe me delikatesë. Gjatë kohës sa shikoja filmin ai profesionisti brenda vetes më vinte shumë mirë që në Ukrainë në këtë kohë po dokumentohet edhe kjo rezistencë e grave… Shumë pak flitet dokumentohet dhe shumë pak tregohet kjo pjesë (në Kosovë). Kohët kane ndryshuar në krejt botën edhe në Kosovë dhe gjithandej dhe zërat e grave po dëgjohen gjithandej”, tha Zeqiri.

Gazetarja hulumtuese Serbeze Haxhiaj ka folur mbi përvojat e saj gjatë kohës së luftës në Kosovë.

“Ma ktheu atë ankthin kur lenim termin në ora 18:00 dhe gazetarët kishin ankth se lëshohej alarmi dhe kishim frikë se mos ndonjëra nuk do të jetë gjallë. Ka shumë ngjashmëri me ne. Shoh një forcë shumë më të madhe për të qëndruar fuqishëm drejt fitores së tyre”, tha ajo.

•