Kosova ka mësuar kundërshtarët e saj në shortin e hedhur në Bruksel për edicionin e ri të Ligës së Kombeve, ku në grup do të përballet me Izraelin, Austrinë dhe Republikën e Irlandës.

Ndeshjet e këtij kompeticioni do të nisin nga muaji shtator i këtij viti, ndërsa “Dardanët” synojnë të vazhdojnë ngritjen e tyre dhe të synojnë kalimin në një nivel edhe më të lartë.

Në një përgjigje për KosovaPress, pas shortit, kryetari i FFK-së, Agim Ademi, u shpreh optimist për paraqitjen e Kombëtares në këtë grup, duke theksuar progresin e madh që ka bërë ekipi në vitet e fundit.

“Gjithçka është e mundur në këtë grup, por unë e bazoj optimizmin në ngritjen e ekipit tonë, i cili ka bërë një rritje shumë të madhe dhe ka kaluar në një nivel tjetër. Uroj që ‘Gladiatorët Dardanë’ të jenë në formën e tyre më të mirë, të mos kemi lëndime dhe lojtarët të kenë minuta të mjaftueshme në ekipet ku luajnë. Në ndeshjet e këtij grupi duhet ta konsiderojmë secilën si eliminatore, që do të thotë të japim maksimumin. Besoj se nuk është e pamundur të kalojmë në Ligën A.”, theksoi Ademi.

Sa i përket rivalëve, Austria konsiderohet si një nga përfaqësueset më të forta të grupit, ndërsa edhe Republika e Irlandës mbetet një kundërshtar serioz.

“Sa i përket ekipeve në grup, mendoj se Austria është ekip i fortë, së bashku me Republikën e Irlandës. Me këto përfaqësuese nuk jemi takuar asnjëherë më parë, por Austria është një ekip i njohur. Tani jemi të fokusuar në ndeshjet e Kupës së Botës dhe po mundohemi të organizohemi sa më mirë, si brenda fushës ashtu edhe në aspektet tjera organizative. Kërkoj që të gjithë të jemi afër ekipit dhe me pozitivitetin më të madh ta mbajmë ritmin e fitoreve, të krenohemi me ‘Gladiatorët Dardanë’ dhe ta përfaqësojmë shtetin tonë në Kupën e Botës”, deklaroi Ademi.

Kosova do të synojë që në këtë edicion të tregojë stabilitet dhe pjekuri në lojë, duke e trajtuar secilën ndeshje si vendimtare, me synimin final për të realizuar objektivin e madh, ngjitjen në Ligën A. /KosovaPress/

/Kosovapress/