Kryetari i Lidhjes Demokratike të Kosovës, Lumir Abdixhiku, pas takimit me kryeministrin Albin Kurti, ka deklaruar se zgjedhja e presidentit kërkon konsensus të gjerë politik dhe jo garë formale pa votat e nevojshme.

Kreu i LDK-së ka bërë të ditur se partia që ai drejton nuk ka qëndrime refuzuese ndaj askujt, e veçanërisht ndaj presidentes aktuale Vjosa Osmani. Ai ka shtuar se kur nevojiten 81 vota, gara pa marrëveshje paraprake është procedurë e destinuar për dështim.

Ai ka thënë se deri më tani nuk u është propozuar asnjë emër për të  cilin u janë kërkuar nënshkrimet.

Ai ka nënvizuar se presidenti duhet të jetë figurë konsensuale dhe kundërbalancë e qeverisë e jo zgjatim i saj, sidomos në kushtet kur qeveria ka 51 për qind të votave.

“Kur ka garë e s’ka konsensus, është vështirë të bëhen 80 vota. Gara ka kuptim kur janë 61 vota në dispozicion, por kur duhen 81, duhet konsensus dhe unitet dhe kjo nuk është arritur. Për garë, është procedurë e parapërcaktuar për të dështuar, por nëse vendosin LVV dhe PDK të ketë garë, shkojmë në zgjedhje sepse nuk e dimë se si i bëjnë 81 vota. Konsensusi bën president. LDK ka qenë e angazhuar të gjejë president, një emër konsensual, jo zgjatim të qeverisjes. Pra të gjejë një emër konsensual, jo zgjatim të qeverisë, pra të mos jetë vazhdimësi e qeverisë sidomos për një qeveri që ka 51% të votave, presidenti do të duhej të ishte një kundërbalancë. Nuk ka emër, nuk ka proces konsultativ tutje sa po kuptoj dhe tani duhet të presim dy-tri ditët e ardhshme për të kuptuar”, tha ai.

Sipas tij, aktualisht nuk ka ndonjë emër specifik që u është prezantuar për votim dhe nuk është kërkuar vota e LDK-së për ndonjë kandidat të caktuar.

“Herën e kaluar e kemi pas si alternativë. Më pas ka qenë marrëveshja politike dhe konsensusi. Në parim kryetari i LVV-së, ka kërkuar 85 vota, pra nuk pas parakushte e as diskutime për marrëveshje politike. Le ta provojnë garën, por LDK-ja sugjeron që ta provojnë konsensusin para garës. Ne nuk kemi thënë asnjëherë që kemi apo nuk kemi votë për Vjosa Osmani. Natyrisht që jam takuar, si s’jam takuar...LDK gjithmonë ka qenë e përgjegjshme ndaj institucioneve por imponimet nuk janë zgjidhja adekuate...Në këtë fazë nuk kemi qëndrime refuzuese ndaj askujt, e aq më pak ndaj zonjës Osmani...Nuk është prezent një emër i tillë ”, ka thënë ai.

Ai ka bërë të ditur se, me autorizimet e marra nga Kuvendi i LDK-së, do t’i kthehet grupit parlamentar për t’i njoftuar deputetët mbi zhvillimet e fundit dhe takimet me tri partitë politike në vend.

LDK me 15 deputetë, sipas tij, nuk mund të propozojë emër në këtë fazë .

“Të them të drejtën, e shoh shumë, shumë të vështirë çështjen e konsensusit politik në këtë moment brenda partive politike shqiptare. Nuk ka ndonjë kandidat specifik në këtë fazë që na është prezantuar. Në këtë periudhë, me autorizimet që kam marrë nga Kuvendi i LDK-së, do t’i kthehem grupit parlamentar dhe do t’i, njoftoj të gjithë ata për zhvillimet e fundit politike dhe diskutimet që kemi pasur unë si kryetar i LDK-së me tri partitë politike në Republikën e Kosovës. Pra, e shoh të vështirë konsensusin. Nuk ka ndonjë emër që na është prezantuar. Nuk na është kërkuar vota për ndonjë emër specifik. LDK-ja me 15 deputetë as mund të caktojë emër për kandidat në këtë fazë, as mund të nominojë dot sepse siç e dini duhen 30 nënshkrime për këtë fazë. Le të presim deri më datën 5 mars, ditën e Epopesë së UÇK-së, për të kuptuar se çfarë fati do të ketë institucioni më i lartë i vendit. Edhe një herë ritheksojmë se është e domosdoshme, do të duhej të ishte e domosdoshme të kishim unitet, të kishim një emër që përfaqëson unitetin popullor që të mos jetë zgjatim i qeverisë. Por në këtë fazë duket se konsensusi politik brenda partive politike është i pamundur. Natyrisht kur s’ka konsensus do të ketë garë, por garë LDK-ja nuk e preferon si të tillë sepse rezultati dihet. Kur ka garë e s’ka konsensus është vështirë të bëhen 80 vota. Pra gara ka kuptim, gara ka kuptim kur janë 61 vota në dispozicion, por kur duhen 80 duhet konsensus në thelb. Këtë s’e kemi arritur”, theksoi ai.

Kreu i LDK-së u pyet nëse takimet do të vazhdojnë, por sipas qëndrimit të tij, zor të ndodhë një gjë e tillë.

“Sipas të gjitha gjasave, vështirë, por nëse ka zhvillime të reja, do ta kemi takimin e radhës”, përfundoi Abdixhiku.

/Kosovapress/