Presidenti i Interit, Beppe Marotta, ka reaguar lidhur me “rastin Rocchi” dhe zhvillimet e fundit që kanë tronditur arbitrimin italian, duke theksuar se klubi zikaltër nuk ka asnjë lidhje me akuzat.

Pak minuta para ndeshjes ndaj Torino, Marotta deklaroi: “Interi nuk ka gjyqtarë të preferuar ose të pafavorshëm: Interi gjithmonë ka vepruar me integritetin më të madh dhe gjithmonë do të veprojë, prandaj jemi të sigurt për atë që kemi mësuar deri më tani vetëm përmes shtypit.”

Ai u shpreh i qetë për situatën, duke shtuar se klubi nuk është i përfshirë në hetimet që kanë çuar në shkarkime në radhët e arbitrave italianë. “Ne e dimë që gjithmonë kemi vepruar me integritetin më të madh dhe kjo duhet t’i qetësojë të gjithë. Ky është fakti më i rëndësishëm”, deklaroi ai.

Në vijim, kreu i Nerazzurrëve përmendi edhe disa vendime të diskutueshme nga sezoni i kaluar: “Është gjithashtu e qartë se vitin e kaluar, objektivisht, patëm dhe nuk po ankohem, vendime të pafavorshme, të cilat do të thoja se u konfirmuan më pas nga autoritetet e arbitrimit, siç është penalltia që nuk u dha në Inter-Roma.”

Në fund, Marotta theksoi fokusin e skuadrës tek objektivat sportive: “Jemi këtu sot duke menduar për këtë ndeshje, këtë kampionat, këtë Scudetto që duam ta sjellim në shtëpi. Jam i qetë; Interi nuk ka të bëjë fare me të gjitha këto dhe do të vazhdojë ta bëjë këtë në të ardhmen.”

KosovaPress