Për tri ditë radhazi në Prishtinë, rreth 40 biznese do të promovojnë punimet e tyre në panairin "Grate në Biznes".

Në sheshin e kryeqytetit janë bërë bashkë gra nga e gjithë Kosova, ku në hapje të panairit ka marrë pjesë edhe ministrja e Industrisë, Ndërmarrësisë dhe Tregtisë, Rozeta Hajdari.

Ministrja u bëri thirrje grave që të aplikojnë për grante.

"Tani për tani ministria ka lansuar grand skemën për artizanatet dhe keni mundësinë të aplikoni sepse janë gati gjysmë milion euro për juve. Ju dëshiroj sa më shumë suksese dhe uroj sa më shumë hapësira për juve vitet e ardhshme", deklaroi ajo.

Ministria e Industrisë, Ndërmarrësisë dhe Tregtisë përmes Agjencisë për Investime dhe Përkrahjen e Ndërmarrjeve në Kosovë (KIESA) organizon panairin “Gratë në Biznes” në të cilin po marrin pjesë biznese dhe shoqata të grave ndërmarrëse nga komunitete të ndryshme të Kosovës.

Sipas njoftimit të ministrisë, përveç promovimit të bizneseve dhe shoqatave të udhëhequra nga gratë dhe produkteve që këto biznese ofrojnë në fushat e tyre përkatëse, ky panair ka për qëllim edhe inkurajimin e ndërmarrësisë dhe rrjetëzimin të gratë ndërmarrëse me qëllim të fuqizimit sa më të madh të tyre në shoqëri dhe në biznes.