Llapi ka zyrtarizuar transferimin e qendërmbrojtësit zviceran Aris Aksel Sorensen, i cili ka nënshkruar kontratë trevjeçare me klubin, të vlefshme deri në verën e vitit 2029.

Klubi nga Podujeva bëri të ditur se 25-vjeçari iu bashkua ekipit pas përfundimit me sukses të ekzaminimeve mjekësore dhe tashmë ka nisur stërvitjet me skuadrën në prag të sezonit të ri.

Sorensen, i gjatë 1.91 metra, luan në qendër të mbrojtjes dhe vjen me përvojë nga futbolli zviceran dhe ai italian. Gjatë karrierës së tij ai ka qenë pjesë e akademisë së Sampdorias, ndërsa më pas ka luajtur për Paradiso dhe së fundmi për Bellinzona.

Me afrimin e mbrojtësit zviceran, Llapi synon të rrisë konkurrencën në repartin defensiv dhe të forcojë skuadrën për edicionin e ri të Superligës së Kosovës, i cili nis më 15 gusht.

Në njoftimin e klubit, Llapi i ka uruar mirëseardhje Sörensenit, duke i dëshiruar shëndet, suksese dhe sa më shumë fitore me fanellën bardhekaltër.

KosovaPress