Newcastle United ka siguruar shërbimet e një prej talenteve më premtuese të futbollit holandez, mesfushorit 18-vjeçar Sean Steur, i cili largohet nga Ajaxi në një transferim me vlerë totale prej 27 milionë eurosh.

Klubi anglez lëvizi me shpejtësi për të mbyllur marrëveshjen me talentin holandez, i cili konsiderohet një nga produktet më të spikatura të akademisë së Ajaxit në vitet e fundit.

Steur iu bashkua akademisë së Ajaxit në vitin 2016, pasi kishte spikatur te Volendam. Ai u dallua që në moshë të hershme për teknikën e lartë, kontrollin e topit dhe aftësinë në organizimin e lojës, duke u krahasuar shpesh me ish-mesfushorin e Ajaxit dhe Barcelonës, Frenkie de Jong.

Debutimin në futbollin profesionist e bëri në maj të vitit 2024 me Jong Ajax, ndërsa paraqitjen e parë me ekipin e parë e regjistroi nën drejtimin e trajnerit Francesco Farioli në një fitore 4-0 ndaj Heracles Almelo.

Gjatë sezonit 2025/26, Steur fitoi më shumë hapësira në formacionin e parë të Ajaxit, duke u aktivizuar edhe në Ligën e Kampionëve, ku kontribuoi me një asist ndaj Qarabagut. Ai tërhoqi vëmendjen edhe në përballjet kundër Feyenoordit, ku shfaqi pjekuri dhe cilësi në mesfushë, ndërsa më vonë realizoi edhe golin e tij të parë në derbin e madh holandez.

Megjithatë, bisedimet për vazhdimin e kontratës me Ajaxin nuk arritën në përfundim, pasi lojtari dhe familja e tij nuk u bindën nga projekti sportiv i klubit pas ndryshimeve në drejtimin teknik.

Kjo situatë i hapi rrugë Newcastle United, që arriti marrëveshjen për transferimin e tij në një kohë shumë të shkurtër.

Edhe pse ka zhvilluar vetëm 26 ndeshje me ekipin e parë të Ajaxit, Steur konsiderohet një investim për të ardhmen, falë potencialit të madh dhe cilësive teknike.

Mesfushori 18-vjeçar shquhet për pasimet e sakta, kontrollin e topit dhe aftësinë për të ndërtuar aksione. Në pjesën e dytë të sezonit të kaluar ai ishte i treti te Ajaxi për pasime të sakta në gjysmën kundërshtare me 432 pasime dhe një saktësi prej 87.1 për qind. Gjithashtu krijoi 20 raste për gol, prej të cilave 17 erdhën nga loja e hapur, duke u renditur ndër lojtarët më kreativë të skuadrës.

Me këtë transferim, Newcastle synon të ndërtojë skuadrën për të ardhmen, ndërsa Sean Steur pritet të jetë një nga emrat që do të ndiqet me interes në futbollin anglez gjatë viteve në vazhdim.

KosovaPress