Në kuadër të aktiviteteve të Javës Olimpike 2026, më 3 qershor në Prishtinë u shënua Dita Botërore e Sportit dhe Mjedisit, me aktivitete të organizuara në Parkun e Qytetit.

Ky aktivitet solli në fokus lidhjen e ngushtë mes sportit dhe mbrojtjes së mjedisit, duke përcjellë mesazhe ndërgjegjësuese për rëndësinë e një ambienti të pastër për zhvillimin e një jete të shëndetshme dhe aktive.

Kushtrim Krasniqi zëdhënës i KOK-ut, theksoi se pa një mjedis të pastër nuk mund të ketë sport cilësor dhe sportistë të shëndetshëm.

“Kjo ditë është tejet e veçantë për shkak se, nëse nuk kemi një ambient të pastër, nuk mund të kemi as sport të shëndetshëm dhe sportistë të shëndetshëm. Prandaj, mesazhi i këtij aktiviteti është që ta ruajmë ambientin, ta ruajmë për fëmijët tanë, për të ardhmen tonë dhe për të gjithë sportistët të cilët kanë nevojë që aktivitetin e tyre fizik ta zhvillojnë në një ambient të pastër” – theksoi Krasniqi.

Ndërsa, Vjollca Krasniqi kryetarja e Komisionit, vuri në pah rëndësinë e përbashkët të sportit dhe mjedisit për të ardhmen e shoqërisë.

"Sot shënojmë dy vlera të rëndësishme për jetën dhe të ardhmen tonë, Ditën Botërore të Mjedisit dhe Sportit, të cilat janë të lidhura shumë ngushtë njëra me tjetrën. Një mjedis i pastër sigurisht që krijon kushte më të mira për jetë të shëndetshme. Mjedisi është shtëpia jonë e përbashkët. Çdo pemë e mbjellë, çdo hapësirë e gjelbëruar dhe çdo veprim sado i vogël për mbrojtjen e natyrës është një investim për veten, por edhe për brezat e ardhshëm. Le të angazhohemi që krahas promovimit të aktivitetit fizik dhe sportiv, të kujdesemi për shtëpinë tonë të quajtur mjedis. Një shoqëri e shëndetshme ndërtohet me njerëz të shëndetshëm dhe një natyrë të mbrojtur. Le të jetë kjo një thirrje për veprim të çdoditshëm, jo vetëm një ditë kalendarike e shënuar. Të mbjellim sa më shumë pemë, lule, të kultivojmë dashuri për sportin dhe mjedisin" – tha Krasniqi.

Në anën tjetër, Iber Alaj drejtori i Departamentit të Sportit në Ministrin e Rinisë dhe Sportit (MRS), theksoi nevojën për investime të reja në hapësira të gjelbëruara, duke propozuar krijimin e zonave të reja për zhvillimin e aktiviteteve sportive dhe mjedisore.

"Dita Botërore e Mjedisit është shumë e rëndësishme që ne t’i promovojmë iniciativat e tilla, por në të ardhmen kërkojmë nga Komuna e Prishtinës që të gjejë një vend të ri, jo në një park ku ka gjelbërim, po ta bëjmë një park tjetër të gjelbëruar apo një mjedis tjetër ku ka nevojë për investim. Besoj që edhe Komiteti Olimpik i Kosovës me buxhetin e tij solid, edhe me mbështetjen e Ministrisë, munden me bë edhe një pikë tjetër të mjedisit" – shtoi Alaj.

Aktiviteti i 3 qershorit u karakterizua nga pjesëmarrësit duke kombinuar aktivitetet fizike me mesazhe për ruajtjen e natyrës dhe promovimin e një jetese të shëndetshme.

KosovaPress