Jurgen Klopp ka konfirmuar se bisedimet për t'u bërë përzgjedhësi i ri i Kombëtares së Gjermanisë kanë hyrë në një fazë të avancuar, duke lënë të kuptohet se emërimi i tij zyrtar mund të bëhet brenda pak ditësh.

Trajneri gjerman reagoi pas raportimeve të mediave gjermane se Federata Gjermane e Futbollit (DFB) dhe Red Bull kishin arritur një marrëveshje që do t'i hapte rrugë Kloppit për të pasuar Julian Nagelsmann në krye të kombëtares.

Duke folur për MagentaTV, Klopp tha se ende nuk është finalizuar gjithçka, por theksoi se procesi po ecën sipas planit. "Asgjë nuk është finalizuar ende. Por bisedimet kanë shkuar mirë dhe gjithçka po ecën në drejtimin e duhur. Kam arritur një marrëveshje me Red Bull, një marrëveshje shumë bujare. Praktikisht, asgjë nuk më pengon më", deklaroi ai.

Klopp shtoi se palët janë shumë pranë përfundimit të marrëveshjes dhe se njoftimi zyrtar pritet të bëhet nga vetë ato. "Nuk jemi shumë larg të qenit në gjendje të bëjmë një njoftim. Kur të vijë koha, do ta bëjmë vetë njoftimin. Idealisht kjo duhet të ndodhë brenda pak ditëve të ardhshme. Kanë mbetur vetëm rreth 60 ditë deri në ndeshjen e ardhshme ndërkombëtare, ndaj në një moment duhet të merret vendimi dhe ai do të merret", u shpreh Klopp.

Deklaratat e ish-trajnerit të Liverpoolit forcojnë pritshmëritë se ai do të jetë përzgjedhësi i ardhshëm i Gjermanisë, me zyrtarizimin që pritet të ndodhë së shpejti.

KosovaPress