Skuadra e Kastriotit është shpallur kampion i Kosovës te juniorët në hendboll, pas një finale dramatike dhe me rivalitet të zhvilluar kundër Besa Famgas.

Finalja e Ligës së Juniorëve të Kosovës në hendboll U20 u zhvillua të hënën mbrëma në palestrën “Jeton Tërstena – Tota” në Vushtrri.

 Kastrioti triumfoi me rezultat 39:38, ku Besa ishte në epërsi deri pas minutës së 40-të. Por më pas ferizajasit morën kontrollin dhe krijuan epërsi deri në tri gola në disa raste. Dhe në fund e mbajtën epërsinë e një goli për titull të kampionit.

Ndërkohë, hendbollisti Ledri Mustafa i shënoi 13 gola për ferizajasit, kurse Diolen Ajvazi 12. Me tetë gola i ndihmoi në fitore Edonis Saiti, kurse tek Besa Famgas, Ilir Istrefaj i shënoi 11 gola, derisa dhjetë i kishte Ajan Muqolli.

Kapitenit të Kastriotit, kupën e kampionit ia dërzoi Xhavit Morina, nënpresidenti i FHK-së.

KosovaPress