Futbollisti nga Vushtrria, Fatjon Bunjaku, ka humbur jetën në një akisdent trafiku që ka ndodhur mbrëmjen e së shtunës, pas pak mesnate, në magjistralen Prishtinë-Mitrovicë.

Lajmi për vdekjen e tij u bë i ditur fillimisht përmes një njoftimi në rrjetet sociale nga fshati Samadrexhë i komunës së Vushtrrisë. Në njoftim thuhet se Bunjaku ka ndërruar jetë tragjikisht si pasojë e aksidentit, ndërsa familjarët kanë bërë të ditur se për kohën dhe vendin e varrimit do të njoftojnë më vonë.

“Ka ndërruar jetë tragjikisht Fatjon Fatmir Bunjaku. Të nderuar bashkëvendas, ju njoftojmë që mbrëmë në një aksident tragjik ka ndërruar jetë Fatjon Fatmir Bunjaku. Për ditën dhe orën e varrimit do t’ju njoftojmë me kohë”, thuhet në njoftim.

Gjatë karrierës së tij, Fatjon Bunjaku veshi fanellat e disa skuadrave në Kosovë, Kroaci dhe Shqipëri. Ai hapat e parë në futbollin profesionist i bëri te Trepça, për të vazhduar më pas aventurën në Kroaci te Zmaj Makarska. Pas rikthimit në Kosovë, Bunjaku luajti sërish për Trepçën, ndërsa më pas ishte pjesë e Phoenixit, Lirisë, Gjilanit dhe Malishevës. Kapitullin e fundit të karrierës së tij e shkroi në Shqipëri me Elbasanin, klub me të cilin ishte i angazhuar.

Bunjaku së fundmi ishte pjesë e klubit AF Elbasani, ndërsa gjatë karrierës së tij kishte qenë edhe pjesë e përfaqësueses Kosova U21.

KosovaPress