Bota e futbollit është vënë në alarm pas raportimeve se talenti i jashtëzakonshëm i Lamine Yamal mund të përballet me një mungesë të gjatë për shkak të një dëmtimi serioz, që potencialisht mund ta lërë jashtë Kupës së Botës 2026.

Ylli i Barcelonës u dëmtua në ndeshjen ndaj Celta Vigos, ku katalanasit fituan 1–0. Yamal realizoi golin e vetëm nga penalltia që vetë e fitoi, por menjëherë pas ekzekutimit sinjalizoi stolin për një problem fizik dhe u rrëzua në tokë pa festuar. Ai u largua nga fusha para përfundimit të pjesës së parë, duke shkaktuar shqetësim të madh te tifozët dhe stafi teknik.

Sipas raportimeve fillestare nga ESPN dhe gazetës Mundo Deportivo, ekziston dyshimi për një këputje të muskulit të kofshës së pasme. Gazetarja Gemma Soler deklaroi se nëse dëmtimi është i lehtë, Yamal mund të mungojë rreth tre deri në katër javë, por në rast se këputja është më serioze, atëherë sezoni i tij mund të konsiderohet i përfunduar dhe rikthimi në formë për Botërorin të vihet seriozisht në pikëpyetje.

Testet mjekësore që pritet të kryhen në orët në vijim do të japin një diagnozë më të qartë për shkallën e dëmtimit dhe kohëzgjatjen e rikuperimit. Megjithatë, skenari që Yamal të mungojë në gjashtë ndeshjet e mbetura të sezonit është gjithnjë e më realist.

Mungesa e tij do të ishte një goditje e madhe për Barcelonën, e cila aktualisht kryeson garën në La Liga me nëntë pikë më shumë se Real Madridi. Edhe pse titulli duket pothuajse i sigurt, humbja e një lojtari kyç si Yamal mund të komplikojë fundin e sezonit, sidomos në ndeshje të rëndësishme si “El Clásico” i 10 majit.

Megjithatë, prioriteti kryesor për klubin dhe lojtarin pritet të jetë rikuperimi i plotë në kohë për Kupën e Botës 2026. Nëse konfirmohet një dëmtim i rëndë, mungesa e Yamal në këtë turne do të ishte një humbje e madhe jo vetëm për Spanjën, por edhe për spektaklin global të futbollit, duke qenë se ai konsiderohet një nga talentet më të ndritshëm të gjeneratës së re.

KosovaPress