Izraeli ka vazhduar presionin intensiv ndaj Libanit me sulme që sipas tij kanë shënjestruar militantët e mbështetur nga Irani, Hezbollah, duke goditur disa ndërtesa banimi në Bejrut dhe duke lënë të paktën gjashtë të vdekur.

Në Iran, kompleksi i centralit bërthamor në Bushehr u godit nga një predhë, por nuk pati të lënduar dhe centrali nuk pësoi dëme, bëri të ditur Agjencia Ndërkombëtare për Energjinë Bërthamore (IAEA), pasi mori një raport nga Teherani. Kreu i IAEA-s, Rafael Grossi, përsëriti thirrjen për “përmbajtje maksimale gjatë konfliktit për të parandaluar rrezikun e një aksidenti bërthamor”.

Sipas AP, çmimi i naftës së papërpunuar Brent, standardi ndërkombëtar, mbeti mbi 100 dollarë për fuçi në tregtimin e hershëm të së mërkurës, duke u rritur për më shumë se 40% që nga fillimi i luftës, përcjell KosovaPress.

Që nga nisja e luftës më 28 shkurt, kur Shtetet e Bashkuara dhe Izraeli sulmuan Iranin, Teherani ka vënë në shënjestër infrastrukturën energjetike të fqinjëve arabë të Gjirit, si dhe baza ushtarake, si pjesë e një strategjie për të rritur çmimet e naftës dhe për t’i bërë presion Uashingtonit të tërhiqet.

Irani gjithashtu nuk ka dhënë shenja të tërheqjes nga kontrolli i tij mbi Ngushticën e Hormuzit, rruga detare përmes së cilës kalon rreth një e pesta e naftës botërore, duke shtuar shqetësimet për një krizë globale energjetike.