Në tetëvjetorin e ndarjes nga jeta të legjendës së futbollit kosovar, Fadil Vokrrit, Gashani, ka bërë homazhe, duke vendosur lule të freskëta pranë shtatores së tij.

Përmes një postimi në faqen e tij zyrtare, ministri ka ndarë kujtimet dhe emocionet për figurën e Vokrrit, duke e cilësuar atë si një nga personalitetet më të rëndësishme në historinë e sportit dhe shtetndërtimit të Kosovës.

“Në tetëvjetorin e shuarjes, bashkë me këshilltarët e mi, dërguam lule të freskëta - të freskëta si kujtimi për të - tek shtatorja e krenarisë kombëtare, Fadil Vokrrit”, ka shkruar ministri.

Ai ka rikujtuar edhe një shkrim të mëhershëm kushtuar Vokrrit, duke theksuar se ende e kujton si të gjallë figurën e tij dhe kontributin e jashtëzakonshëm që dha për futbollin dhe vendin.

Në mesazhin e tij, ministri e përshkruan Vokrrin si heroin e fëmijërisë së shumë brezave dhe si njeriun që ngriti në këmbë stadiumet, duke mbushur zemrat e qytetarëve me krenari. Ai ka vënë në pah edhe rolin kyç të Vokrrit në anëtarësimin e Kosovës në UEFA dhe FIFA, duke e cilësuar atë si një moment historik për sportin kosovar.

“Sot, në 8 vjetorin e ndarjes tënde nga jeta, Kosova të kujton me mall, me mirënjohje dhe me krenari. Sepse disa njerëz nuk largohen kurrë plotësisht. Ata mbeten në kujtesën e një populli, në frymëzimin e brezave dhe në historinë që kanë ndërtuar me punë, dinjitet dhe dashuri për atdheun”, shkroi Gashani.

Në fund, ai ka theksuar se Fadil Vokrri do të mbetet përjetë pjesë e historisë dhe krenarisë së Kosovës, duke lënë një trashëgimi të pashlyeshme për brezat që vijnë.

KosovaPress