Phil Foden ka rinovuar kontratën me Manchester Cityn, duke nënshkruar një marrëveshje të re katërvjeçare, me opsion zgjatjeje edhe për 12 muaj, që do ta mbajë në “Etihad” deri në vitin 2030.

Mesfushori ofensiv 26-vjeçar u shpreh i lumtur që do të vazhdojë karrierën te klubi ku është rritur si futbollist, duke theksuar se synimi mbetet fitimi i trofeve të tjerë.

“Ta lidh të ardhmen time me Cityn do të thotë gjithçka për mua. Të luaj për këtë klub ka qenë gjithmonë ëndrra ime dhe është nder të vesh këtë fanellë. Kemi arritur suksese historike, por gjithmonë synojmë të fitojmë edhe më shumë”, deklaroi Foden.

Ai gjithashtu mirëpriti rikthimin e Enzo Marescës në krye të Manchester Cityt, duke kujtuar bashkëpunimin e tyre gjatë sezonit të tripletës në vitin 2022-23, kur italiani ishte ndihmës i Pep Guardiolës.

“Mezi pres të punoj sërish me Enzon. Ai ishte fantastik gjatë sezonit të tripletës dhe të gjithë lojtarët e respektonin. Rikthimi i tij është shumë emocionues dhe besoj se do të vazhdoj të përmirësohem”, shtoi ai.

Pas largimit të John Stones dhe Bernardo Silvës, Foden është futbollisti më i dekoruar në skuadrën aktuale të Cityt, me gjithsej 17 trofe madhorë. Ai ka fituar gjashtë tituj të Premier League, një Ligë të Kampionëve, tri FA Cup, pesë Kupa të Ligës, një Superkupë të UEFA-s dhe një Kupë të Botës për Klube.

Foden pranoi se nuk e kishte imagjinuar kurrë se do të qëndronte kaq gjatë te Manchester City.

“As në ëndrrat e mia nuk do ta mendoja këtë. Synimi im ishte vetëm të arrija në ekipin e parë, ndërsa fakti që kam kaluar kaq shumë vite këtu është një ëndërr e bërë realitet”, u shpreh ai.

Rinovimi i kontratës vjen në një moment kur drejtuesit e klubit, përfshirë trajnerin Enzo Maresca dhe drejtorin sportiv Hugo Viana, besojnë se Foden mund të rikthehet në formën e tij më të mirë, pas një sezoni në të cilin humbi vendin e titullarit dhe mbeti jashtë përzgjedhjes së Anglisë për Kupën e Botës.

Foden është pjesë e akademisë së Manchester Cityt që nga mosha tetëvjeçare dhe e ka kaluar të gjithë karrierën profesionale me klubin anglez.

KosovaPress