Sulmuesi i talentuar kosovar, Fisnik Asllani, mbetet një nga emrat më të përfolur në listën e transferimeve të Borussia Dortmund për këtë verë.

Sipas raportimeve të fundit nga media gjermane, Bild, drejtuesit e klubit verdhezi po e shqyrtojnë seriozisht mundësinë e transferimit të 23-vjeçarit nga Hoffenheimi. Asllani shihet si një opsion i rëndësishëm për repartin ofensiv, veçanërisht në rast se njëri nga sulmuesit aktualë, Serhou Guirassy ose Karim Adeyemi, largohet gjatë merkatos verore.

Burimet bëjnë të ditur se ka pasur kontakte të fundit mes Dortmundit dhe përfaqësuesve të lojtarit. Vetë Asllani është i hapur për një transferim në “Signal Iduna Park”, ndërsa klubi ka konfirmuar interesin e vazhdueshëm. Megjithatë, çdo hap konkret drejt marrëveshjes pritet të varet nga zhvillimet në repartin sulmues të ekipit.

Për momentin, qëndrimi i Guirassy dhe Adeyemi e komplikon një transferim të menjëhershëm. Por nëse njëri prej tyre largohet, Dortmundi mund të reagojë shpejt dhe të konkretizojë afrimin e Asllanit.

Forma e mirë e sulmuesit në muajt e fundit ka tërhequr vëmendjen e shumë klubeve. Pas një periudhe të suksesshme huazimi te Elversberg, ku spikati me gola dhe asistime, ai ka vazhduar zhvillimin pozitiv edhe te Hoffenheimi, duke u bërë pjesë e rëndësishme e tregut ndërkombëtar të transferimeve.

Vlera e tij në treg vlerësohet rreth 30 milionë euro për klubet që kanë marrë pjesë në Ligën e Kampionëve në vitet e fundit, ndërsa për klubet e tjera çmimi mund të jetë rreth 25 milionë euro.

Ndërkohë, garës për shërbimet e tij i është bashkuar edhe Leipzig, duke e bërë situatën më të ndërlikuar për Dortmundin. Një element në favor të Dortmundit mbetet lidhja e fortë e Asllanit me drejtuesin aktual sportiv, i cili e njeh mirë lojtarin që nga koha e tij te Elversberg.

E ardhmja e Fisnik Asllanit mbetet e hapur, por një gjë është e sigurt, ai është një nga emrat më të përfolur të kësaj vere në Bundesligë.

KosovaPress