Finalja e këtij sezoni në Ligën e Kampionëve ndërmjet Arsenalit dhe Paris Saint-Germain do të zhvillohet të shtunën me një orar të pazakontë, duke filluar nga ora 18:00.

Tradicionalisht, finalet e kësaj gare prestigjioze evropiane janë zhvilluar në orën 20:00, mirëpo këtë herë UEFA ka vendosur që ndeshja të nisë më herët, një vendim që ka tërhequr vëmendjen e opinionit sportiv.

Sipas UEFA-s, ndryshimi i orarit është bërë me qëllim përmirësimin e përvojës së përgjithshme të ditës së ndeshjes, duke u ardhur në ndihmë tifozëve, ekipeve dhe qytetit pritës. Finalja do të luhet në “Puskas Arena” në Budapest, të Hungarisë, ku pritet një interesim i madh nga tifozët e të dy skuadrave.

Një ndër arsyet kryesore për këtë vendim lidhet me lehtësimin e udhëtimit për mbështetësit që do të jenë të pranishëm në stadium. Me një orar më të hershëm, tifozët do ta kenë më të lehtë qasjen në transportin publik, sidomos pas përfundimit të ndeshjes, duke garantuar një kthim më të sigurt dhe më të rehatshëm.

Në një deklaratë zyrtare, UEFA theksoi se ky vendim synon të optimizojë logjistikën dhe operacionet, duke sjellë përfitime konkrete për të gjithë të përfshirët.

“Vendimi është hartuar për të përmirësuar përvojën e përgjithshme të ditës së ndeshjes për tifozët, ekipet dhe qytetet pritëse duke optimizuar logjistikën dhe operacionet, duke ofruar njëkohësisht disa përfitime të prekshme.”

“Qëllimi ynë është ta bëjmë ditën e ndeshjes një përvojë vërtet të këndshme për të gjithë ata që duan të jenë pjesë e emocioneve, duke krijuar njëkohësisht një atmosferë mikpritëse që e bën të lehtë për familjet dhe fëmijët të marrin pjesë në ndeshjen më të madhe dhe më të rëndësishme të futbollit të klubeve të sezonit.”

“Për mbështetësit që udhëtojnë, kjo do të thotë akses më i mirë në transportin publik - veçanërisht pas ndeshjes - dhe një udhëtim më të sigurt dhe më të përshtatshëm për t’u kthyer nga stadiumi. Për qytetet pritëse, kjo do të rrisë ndikimin pozitiv ekonomik të ngjarjes duke u dhënë tifozëve mundësinë për të vazhduar festimet e tyre.

“Ora e re e fillimit të ndeshjes përputhet gjithashtu me një dritare transmetimi më të arritshme, duke ndihmuar që finalja të arrijë një audiencë edhe më të gjerë televizive dhe dixhitale në të gjithë botën, me një fokus të veçantë në angazhimin e shikuesve më të rinj.”

Presidenti i UEFA-s, Aleksander Ceferin, konfirmoi se vendimi është marrë duke vendosur tifozët në qendër të planifikimit.

“Me këtë ndryshim, ne po e vendosim përvojën e tifozëve në qendër të planifikimit tonë. Finalja e Ligës së Kampionëve UEFA është kulmi i sezonit të futbollit, dhe ora e re e fillimit do ta bëjë atë edhe më të arritshme, gjithëpërfshirëse dhe me ndikim për të gjithë të përfshirët”.

“Ndërsa një fillim në orën 21:00 të Evropës Qendrore është shumë i përshtatshëm për ndeshjet e mesjavës, një fillim më i hershëm të shtunën për finalen do të thotë një përfundim më i hershëm – pavarësisht kohës shtesë apo penalltive – dhe u ofron tifozëve mundësinë për të shijuar pjesën tjetër të mbrëmjes me miqtë dhe familjen, duke reflektuar mbi ndeshjen e sezonit.”=

Finalja ndërmjet Arsenalit dhe PSG-së pritet të jetë një spektakël i madh futbolli, ndërsa ndryshimi i orarit synon ta bëjë këtë ngjarje edhe më të aksesueshme dhe të këndshme për tifozët në mbarë botën.

KosovaPress