FIFA po shqyrton mundësinë e zgjerimit të Botërorit të Klubeve nga 32 në 48 skuadra për edicionin e vitit 2029, sipas raportimeve të mediave britanike dhe italiane. Ideja ka fituar mbështetje të konsiderueshme pas suksesit komercial të formatit të ri me 32 ekipe dhe interesimit të madh nga klubet që mbetën jashtë turneut të fundit.

Sipas raportimeve, zgjerimi do t’i hapte rrugë pjesëmarrjes së më shumë klubeve të mëdha evropiane, pasi në edicionin e fundit munguan emra të rëndësishëm si Liverpool, Barcelona dhe Manchester United. për shkak të kritereve aktuale të kualifikimit dhe kufizimit të numrit të skuadrave nga i njëjti shtet.

Burimet bëjnë të ditur se UEFA nuk pritet ta bllokojë projektin, ndërsa një nga opsionet që po diskutohet është rritja e numrit të vendeve për klubet evropiane. FIFA ende nuk ka marrë një vendim zyrtar, por diskutimet për formatin e vitit 2029 tashmë kanë nisur dhe zgjerimi në 48 skuadra konsiderohet skenari më i mundshëm.

Botërori i Klubeve 2029 është planifikuar të zhvillohet gjatë muajve qershor dhe korrik, ndërsa vendi organizator ende nuk është konfirmuar zyrtarisht.

KosovaPress