Kandidati i Vetëvendosjes për kryetar të Komunës së Mitrovicës Veriore, Erden Atiq, në një intervistë për KosovaPress, ka premtuar se do të demokratizojë komunën të cilën synon ta udhëheqë.

Ai konsideron se diskriminimi i hapur ndaj komuniteteve të caktuara është problemi më i madh që ka kjo komunë, me të cilin do të ballafaqohet menjëherë pas ardhjes në pushtet.

Atiq, duke folur edhe për kundër kandidatët nga subjektet e tjera politike që garojnë për udhëheqjen e kësaj komune, thotë për vete se është kandidati më i aftë për t’u përballur me sfidat e kësaj komune, siç e quan ai, problematike.

Sipas tij, ka kushte të plota për mbajtjen e zgjedhjeve më 23 prill dhe sa i përket situatës së sigurisë në veri ka ndryshime të mëdha që nuk ka pasur asnjëherë deri më tash, prej pas lufte.

Atiq nuk pret të ndodhë ndonjë incident në veri ditët në vijim dhe as ditën e zgjedhjeve, ndërsa thekson se institucionet e Republikës së Kosovës më në fund po e shtrijnë autoritetin e tyre edhe në këto katër komuna veriore të vendit.

Atiq iu ka bërë thirrje qytetarëve që të dalin ditën e zgjedhjeve në numër sa më të madh për të votuar, ndërsa ka garantuar se do të qëndrojë prapa të gjitha premtimeve të dhëna ndaj tyre.

“Mesazhi im për qytetarët është me dalë sa më shumë të votojnë, me përkrahë cilindo kandidat që ata mendojnë se meriton me udhëheqë komunën për këto dy vite e gjysmë. Me dalë sa më shumë pra, mos të hezitojnë, ndërsa unë si kandidat do të qëndroj prapa premtimeve dhe brengave të cilat i kanë ata’, u shpreh Atiq për KosovaPress. 

Përpos kandidatit të LVV-së, për kryetar të Komunës së Mitrovicës Veriore garojnë edhe Taulant Kelmendi nga Partia Demokratike e Kosovës dhe Betim Osmani nga Iniciativa Qytetare Mitrovica. Të drejtë vote në këtë komunë kanë 18,118 qytetarë.

https://kosovapress.com/admin/%e2%80%8bosmani-qytetaret-duan-zgjidhjen-e-problemeve-serbet-te-lodhur-nga-presioni-i-beogradit/