Trajneri i Arsenalit Mikel Arteta, ka dhënë mesazhin e tij të parë pasi londinezët siguruan titullin kampion në Premier League, duke i dhënë fund pritjes 22-vjeçare për trofeun e kampionit në Angli.

Pas barazimit 1:1 të Manchester Cityit ndaj Bournemouthit, “Topçinjtë” u shpallën matematikisht kampionë të Anglisë për sezonin 2025/26.

Menjëherë pas konfirmimit të titullit, Arteta publikoi një mesazh emocional për lojtarët dhe tifozët e klubit.

“Ne bëmë histori sërish, së bashku. Nuk mund të jem më i lumtur dhe më krenar për të gjithë ata që janë pjesë e këtij klubi. Le ta shijojmë këtë moment”, deklaroi tekniku spanjoll.

Ky është titulli i parë kampion për Arsenalin që nga sezoni historik 2003/04 dhe trofeu i dytë madhor i Artetës në krye të skuadrës londineze, pas triumfit në FA Cup më 2020.

Arsenali kishte përfunduar në vendin e dytë në tri sezonet e fundit, por këtë herë skuadra e Artetës arriti të ruajë ritmin deri në fund dhe të rikthejë titullin në “Emirates Stadium”.

Londinezët tani synojnë ta mbyllin sezonin në mënyrë historike, pasi më 30 maj do të përballen me Paris Saint-Germain në finalen e Ligës së Kampionëve.

KosovaPress