Manchester City ka zyrtarizuar transferimin e Elliot Anderson nga Nottingham Forest për shifrën marramendëse prej 116 milionë funte / 154 milionë dollarë.

Klubi konfirmoi të enjten se mesfushori anglez ka firmosur kontratë 5-vjeçare në Etihad, me opsion edhe për një vit tjetër.

Marrëveshja ishte arritur që në fillim të muajit, por u finalizua këtë javë pas kthimit të lojtarit nga Botërori, ku luajti të 8 ndeshjet me Anglinë që e mbylli e treta.

Anderson, 23 vjeç, tha se është "mbi hënë" që po bashkohet me "një nga klubet më të mëdha në botë":

"Është një klub i ndërtuar për të fituar trofe dhe për të garuar në majë. Janë fitues, janë të pamëshirshëm dhe kjo është lloj skuadre ku dua të jem pjesë. Në 10-12 vitet e fundit, ata kanë dominuar."

Menjëherë thumbimi për rivalët:

"Është një nga derbit më të mëdhenj në botë dhe për aq kohë sa e njoh Manchesterin, City kanë qenë mbretërit e Manchesterit. Mezi pres të jem pjesë e diçkaje të tillë."

Derbi i parë ndaj Manchester United është më 13 shtator në Old Trafford.

Anderson doli nga akademia e Newcastle United (55 ndeshje), para se të kalonte te Forest për 35 milionë funte dy vite më parë, ku luajti 92 ndeshje. Ai do të bashkohet me skuadrën e trajnerit të ri Enzo Maresca muajin tjetër.

Drejtori sportiv Hugo Viana: "Elliot është një nga talentet e spikatur të mesfushës në botën e futbollit. Mund të bëhet një mesfushor komplet."

Transferimi vjen vetëm pak ditë pasi shoku i tij te Anglia, Morgan Rogers, u bashkua me Chelsean nga Aston Villa për 117 milionë funte, duke thyer rekordin britanik.

KosovaPress