Mohamed Salah ka konfirmuar zyrtarisht përmes një videoje në Instagram se do të largohet nga Liverpooli në përfundim të këtij sezoni.

Sulmuesi egjiptian, i cili iu bashkua "The Reds" në vitin 2017, ka vendosur t'i japë lamtumirën klubit pas nëntë viteve të jashtëzakonshme, duke lënë pas një zbrazëti të madhe në formacion. Gjatë kësaj periudhe, Salah u shndërrua në liderin e padiskutueshëm të sulmit, duke udhëhequr skuadrën drejt fitimit të dy titujve të Premier Ligës dhe trofeut të çmueshëm të Champions League.

Trashëgimia që ai lë pas është thjesht historike: në 434 paraqitje zyrtare deri më tani, Salah ka shënuar 254 gola dhe ka kontribuar me 121 asistime, shifra që e rreshtojnë atë mes legjendave më të mëdha të klubit.

Me një kabinet të plotë trofesh që përfshin edhe FA Cup, Carabao Cup dhe Botërorin për Klube, "Mbreti Egjiptian" largohet si golashënuesi më i mirë i epokës moderne të Liverpoolit.

Njoftimi i tij shënon fundin e një rrugëtimi që ndryshoi historinë e fundit të klubit anglez, duke e mbyllur aventurën si një nga lojtarët më produktivë që ka parë ndonjëherë Premier Liga.

Linku i videos

KosovaPress