Zyrtare: Inzaghi qëndron te Interi deri në vitin 2026
Interi ka zgjatur zyrtarisht kontratën me trajnerin Simone Inzaghi deri në qershor të vitit 2026, por presidenti Beppe Marotta siguron se ata "shpresojnë të vazhdojnë edhe më shumë në të ardhmen".
Simone Inzaghi e mori detyrën në verën e vitit 2021 pasi Antonio Conte fitoi Scudetton dhe u largua, raporton KosovaPress.
Në tre vjet, Inzaghi ka fituar tashmë gjashtë trofe me klubin, përkatësisht titullin e Serie A, dy tituj të Kupës së Italisë dhe tre kupa të njëpasnjëshme të Superkupës së Italisë.
Presidenti Marotta e bëri të ditur lajmin në fillim të një konference për shtyp këtë pasdite, pak para stërvitjes parasezonale.
“Ka kaluar shumë pak kohë që nga fundi i një sezoni të mrekullueshëm ku fituam dy trofe të tjerë, Superkupën dhe Scudetton. Sot ne fillojmë një rrugëtim të ri së bashku, fanella jonë do të jetë e stolisur me simbolin trengjyrësh dhe yllin e dytë. Bashkë me ne që drejton ekipin do të kemi sërish Simone Inzaghin. Dëshiroj të njoftoj zyrtarisht se raporti ynë do të vazhdojë deri në qershor 2026, me shpresën për të vazhduar edhe më shumë në të ardhmen”, tha Marotta.
