Kandidati i opozitës shqiptare për president në Maqedoninë e Veriut, Arben Taravari thotë se krahas votave të elektoratit shqiptar pret mbështetjen edhe nga komunitetet e tjera etnike dhe se mundësitë për të kaluar në balotazh janë reale.

“Unë besoj fuqishëm se mund të kalojmë në raundin e dytë sidomos nëse nuk do të kishte kandidat edhe prej partisë tjetër shqiptare, BDI-së. Unë mendoj se kandidati shqiptar mund të shkojë në raundin e dytë, por edhe në këtë garë jam shumë optimist, duke marrë parasysh mbledhjen e nënshkrimeve që e bëmë, për gati 36 orë u mblodhën 10 mijë nënshkrime. Unë e bazoj këtë edhe në zgjedhjen time në postin e kryetarit të komunës së Gostivarit, për të cilën mora përkrahjen e të gjitha komuniteteve, sidomos të shqiptarëve, por edhe të votuesve maqedonas”, ka thënë Taravari në një intervistë për Zërin e Amerikës.

Taravari thotë se burim i krizave në Maqedoninë e Veriut është Kushtetuta e vendit, e cila, sipas tij, duhet ndryshuar, teksa thekson nevojën e zgjedhjes së presidentit në parlament.

“Gjërat kryesore të cilat për të cilat do të flasim janë hapja e Kushtetutës dhe unë mendoj se burim i krizës në Maqedoni është Kushtetuta, e cila u votua në fillim të viteve të ‘90 vetëm me mbështetjen e votuesve maqedonas, po gjithashtu ta shfrytëzojmë rastin të heqim përdorimin e “20%” prej gjuhës shqipe; pastaj zgjedhjen e presidentit. Do të kërkoj që ta zgjedhim presidentin në Kuvendin e Maqedonisë së Veriut, por edhe ndryshimin e gjithë Kushtetutës. Pse të mos e mendojmë Kushtetutën e vitit 1974 kur kishte decentralizim të mirëfilltë në Republikën Socialiste të Maqedonisë, ku gjuhë zyrtare kanë qenë ajo maqedonase, shqipe dhe turke dhe askush nuk ishte bërë pengesë”, ka thënë ai.

Taravari ka folur edhe rreth vendimit për t’u larguar nga pushteti duke u bashkuar me opozitën shqiptare, ndërkohë që sondazhet sërish e nxjerrin BDI-në në epërsi te blloku politik shqiptar.

“Problemi është te votuesi i Aleancës për Shqiptarët dhe esenca, ideologjia dhe kauza kryesore e Aleancës për Shqiptarët. Ne jemi formuar para 10 vitesh si fraksion i PDSH-së dhe votuesi ynë çdoherë na ka parë si antipod i BDI-së dhe partia e cila duhet të sjellë ndryshimin te shqiptarët. Do të ishte jo normale dhe jo reale që ASH-ja të jetë së bashku me BDI-në. Unë mendoj se shqiptarët meritojnë ndryshim. 22 vjet edhe çdo gjë të ishte mirë është shumë, e tepërt, Për këtë arsye unë mendoj se është momenti i duhur për ndryshim. Prej vitit 2011 votuesi shqiptar ka votuar kundër BDI-së, por faktori politik shqiptar s’ka mundur të bashkohet. Është hera e parë që nga viti 2002 që e gjithë opozita shqiptare është së bashku dhe padyshim do ta sjellim ndryshimin e shumëpritur te shqiptarët”, ka thënë Taravari.

Taravari ka komentuar edhe zhvillimet në Aleancën për Shqiptarët, pasi ai u shkarkua nga kreu i partisë.

“Këtu ka një gabim. Është e vërtet se kongresi i tyre, i cili është jo legjitim më ka shkarkuar mua, kurse ne nuk e kemi shkarkuar Ziadin Selën, vetëm e kemi kthyer statutin e 27 marsit 2022 kur u zgjodh Sela për së dyti për kryetar partie. Vetëm atë status e kemi fuqizuar ku nuk ka Kryetar Kuvendi të partisë. Kështu që unë nuk dua t’i hy këtij debati se kishte një fraksion brenda ASH-së që mendonte se ne duhet të jemi bashkë me BDI-në, kryesisht funksionarë të ASH-së derisa ishim në qeveri. Ne do të respektojmë çdo vendim gjykate për këtë çështje”, ka thënë Taravari.

Zgjedhjet parlamentare në Maqedoninë e Veriut mbahen më 8 maj 2024, së bashku me raundin e dytë të zgjedhjeve presidenciale. Raundi i parë për zgjedhjen e presidentit zhvillohet më 24 prill. Në garën për zgjedhjet presidenciale do të jetë edhe një shqiptar - Bujar Osmani, kandidat nga Bashkimi Demokratik për Integrim. Ai aktualisht është ministër i Jashtëm i Maqedonisë së Veriut.