Zgjedhjet lokale në Shqipëri po konsiderohen fitore absolute e Partisë Socialiste dhe debakël politik për opozitën. Derisa procesi i numërimit të votave po shkon drejt fundit, ku deri më tani dihet se nga 61 bashki, PS-ja ka fituar 43 sosh, kurse opozita vetëm shtatë, njohësit e zhvillime politike vlerësojnë se opozita duhet të reformohet që të bëhet alternativë e besueshme për qytetarët atje.
Analisti në Shqipëri, Lutfi Dervishi, thotë për KosovaPress se zgjedhjet lokale të 14 majit janë fitore e qartë e Partisë Socialiste.
“Ka një fitore të qartë të Partisë Socialiste, një performancë të dobët të opozitës për shkak të disa faktorëve por edhe ndasive që ka mes opozitës. Në rezultate befasuese ishte rënia e Shkodrës që ka qenë një qytet e qeverisur nga forcat djathta dhe PD-ja, përgjatë 33 viteve të fundit. Pritet që nesër të konfirmohet rezultati i 61 bashkive për gjithë Shqipërinë. Koalicioni Bashkimi për Fitoren ka arritur të marrë një rezultat të dobët, kryesisht 5-6 bashki të dorës së dytë apo të tretë”, thotë ai.
Edhe njohësi i zhvillimeve politike, Ben Andoni, thotë se zgjedhjet lokale në Shqipëri janë dështim i opozitës.
“Të gjitha këto treguan se akoma administrata jonë vuan problematika të mëdha, të cilat më shumë rrjedhin në fryrje të madhe të administratës dhe politizimin. Tani ka ardhur koha që KQZ-ja të jetë një institucion absolutisht apolitik”, deklaron Andoni.
