Franca ka votuar sot në raundin e parë të zgjedhjeve parlamentare që mund të tronditin BE-në dhe NATO-n, por gjithashtu të kenë pasoja të mëdha për Ukrainën në mes të luftës me Rusinë.

Presidenti Emmanuel Macron dëshiron të rrisë shumicën relative në Dhomën e Ulët të mbajtur nga partia e tij, ndërsa liderja e ekstremit të djathtë Marine Le Pen është e bindur se do të fitojë shumicën absolute në parlament, do të formojë një qeveri dhe do të vendosë kufizime ndaj presidentit Macron mbi Ukrainën.

Macron mbetet president në çdo rast. Kandidatët që fitojnë shumicën absolute në raundin e parë hyjnë në Parlament, por në shumicën e njësive zgjedhore fituesi do të dihet vetëm pas raundit të dytë më 7 korrik.

Ndërkohë që qendrat e votimit janë mbyllur, kanë ardhur rezultatet e para të exit- polleve.  

Gazeta belge Le Soir raporton se National Rally e Marine Le Pen po fiton mes 33.5 dhe 34.5 për qind të votave. Aleanca e majtë New Popular Front është e dyta me 28.5-31.5 për qind të votave. Partia Ensemble e Macron e treta me 19-23 për qind të votave dhe në vendin e katërt republikanët konservatorë me 6.7-10 për qind.

Pjesëmarrja e votuesve francezë u vlerësua në 65.5 për qind, njoftoi sondazhi i Ipsos Talan pak pas orës 18:00. Kjo është pak më e ulët se vlerësimi i parë prej 67.5 për qind, por ende dukshëm më i lartë se pjesëmarrja e regjistruar në vitin 2022, kur ishte 47.5 për qind.

Sondazhi i fundit i IFOP para raundit të parë të zgjedhjeve, i publikuar të premten, parashikon 36.5 për qind për Tubimin Kombëtar dhe 29 për qind për Frontin e Ri Popullor të majtë.

I njëjti sondazh tregoi se e djathta ekstreme do të merrte midis 225 dhe 265 ulëse në asamblenë kombëtare me 577 ulëse, pak nga 289 që nevojiteshin për një shumicë, ndërsa New Popular Front do të merrte 170-200.

Megjithatë, disa sondazhe të tjera e vendosin të djathtën ekstreme në një pozicion më të fortë, duke parashikuar se ajo mund të fitojë edhe shumicën e ulëseve. Një sondazh i kryer për BFMTV tregoi se ekstremi i djathtë ka nga 260 deri në 295 ulëse.