Presidenti i Ukrainës, Volodymyr Zelensky, ka uruar Shtetet e Bashkuara me rastin e 250-vjetorit të Pavarësisë, duke shprehur mirënjohjen për mbështetjen amerikane ndaj Kievit në luftën kundër Rusisë.

Në të njëjtën kohë, ai ka përsëritur kërkesën për furnizimin e Ukrainës me sisteme të mbrojtjes ajrore Patriot.

Në një mesazh të publikuar në Telegram, Zelensky e cilësoi përvjetorin si një moment historik për vlerat e lirisë dhe pavarësisë.

“Sot shënohet 250-vjetori i një prej ëndrrave më të ndritura, më të forta dhe më me ndikim të njerëzimit: ëndrra amerikane për një vend të pavarur, të lirë dhe të begatë, që mbron lirinë, besimin dhe kërkimin e lumturisë”, shkroi presidenti ukrainas.

Duke iu referuar luftës në Ukrainë, Zelensky falënderoi SHBA-në për ndihmën e vazhdueshme dhe theksoi se Kievi vazhdon të ketë nevojë për sisteme Patriot për të mbrojtur qytetarët nga sulmet ruse.

“Kur i drejtohemi Amerikës për sistemet Patriot, besojmë se vlerat e respektit për jetën dhe njerëzit, që frymëzuan kombin amerikan 250 vjet më parë, do të udhëheqin edhe vendimet e sotme. Bota ka nevojë për një lidership që garanton mbrojtjen e lirisë dhe jetës”, u shpreh ai.

Në fund të mesazhit, Zelensky uroi qytetarët amerikanë për 4 Korrikun, duke shtuar: “Amerikë, faleminderit. Jam i bindur se, nëse qëndrojmë së bashku, do ta arrijmë paqen.”

/Kosovapress/