Vetëvendosje nuk i siguroi mjaftueshëm vota aktivistes Feride Rushti për ta bërë atë presidente të shtetit, të hënën.

Aktivistja mori vetëm 63 vota në tentimin e parë, që u mbajt në parlamentin e shtetit. E propozuara tjetër nga Vetëvendosje, Hatixhe Hoxha nuk e fitoi besimin e asnjë deputeti, nga 64 sa ishin në sallë. Një fletëvotim ishte i pavlefshëm. Opozita nuk ishte e pranishme në seancë kur u krye ky votim.

Por, procedura që u ndoq me këtë rast, është krejt ndryshe me atë të 5 marsit, kur Vetëvendosje kishte propozuar kandidatët Glauk Konjufca dhe Fatmire Kollçaku për postin e të parit të shtetit.

Në atë rast, kryetarja e Kuvendit, Albulena Haxhiu nuk procedoi me votimin për ta, meqë në sallë nuk ishin të pranishëm 80 deputetë, sa është i paraparë të jetë kuorumi i domosdoshëm për të validuar votimin në raundin e parë për president. Në sallë, atë ditë, ishin vetëm 66 deputetë të shumicës.

“Po e ndërpresë këtë seancë dhe natyrisht që do ta vazhdojmë nëse plotësohen kushtet”, pati thënë ajo, me rastin e mosvotimit të Konjufcën dhe Kollçakut.

/Kosovapress/