Policia britanike ka publikuar foton e një burri në kërkim që besohet se ka lënë dy valixhe me pjesë të trupit në urën e varur Clifton të Bristolit.

Mbrëmë në orën 23:57, policia ka marrë një denoncim për një burrë me një valixhe që sillet në mënyrë të dyshimtë në urë. Kur oficerët mbërritën dhjetë minuta më vonë, burri ishte larguar, duke lënë valixhen pas. Valixhja e dytë u gjet jo shumë kohë më vonë. Të dy valixhet besohej se përmbanin mbetje njerëzore.

Policia ka nisur kërkimet për të dyshuarin dhe po punon për identifikimin e të ndjerit. Sot po kryhet autopsia.

Në një konferencë shtypi, komandanti i përkohshëm i Bristol, Vicks Hayward-Melen, publikoi një fotografi të të dyshuarit.

Policia tha se burri mbërriti me një taksi, dhe automjeti dhe shoferi janë identifikuar dhe po ndihmojnë në hetimin. I dyshuari besohet të ketë ikur drejt Leigh Woodus, në skajin perëndimor të urës në Somerset verior.

"Ky është një incident shumë shqetësues dhe unë e kuptoj plotësisht shqetësimin që do të shkaktojë në komunitetet tona. Prioriteti ynë i menjëhershëm është të gjejmë njeriun që solli valixhet në urë, të identifikojmë të ndjerin dhe të informojmë të afërmit e tij," tha Hayward-Melen.

Policia kontrolloi zonën, e ndihmuar nga Forca Ajrore e Policisë Kombëtare dhe Roja Bregdetare.

Kordonët e policisë dhe automjetet bllokuan hyrjen në të dy skajet e urës, e cila normalisht ka mesatarisht 11 mijë kalime në ditë. Automjetet mjeko-ligjore ishin parkuar para qendrës së vizitorëve të urës dhe stafi me kostume të bardha mbrojtëse mbante qese plastike, shkruan Guardian.

Policia e Avon dhe Somerset do të hapin një faqe të veçantë në portalin e tyre publik "Major Incident" për të lejuar anëtarët e publikut të japin informacion që mund të ndihmojë në hetim.

• 

•