Donikë Gocaj, një nënë dhe gjyshe 56-vjeçare ka vdekur të martën pas një aksidenti në Manhattan, Nju Jork.

Pasi zbriti nga makina pranë rrugës lindore 52 dhe bulevardit të 5-të , ajo ra rreth 3 metra poshtë në një pusetë e cila gjendej pa kapak.

Gocaj bëri vetëm pak hapa para se të binte  në gropë pasi mbylli derën e makinës.

Një dëshmitar i tregoi New York Post se kur mbeti në gropë ajo po bërtiste “po vdes”.

Ekipet e emergjencës arritën disa minuta pas aksidentit dhe e nxorën trupin e saj pa ndjenja dhe pa reagim nga gropa dhe e dërguan me urgjencë, ku më vonë vdiq nga plagët e marra, thanë autoritetet.

Një përfaqësues i kompanisë së mirëmbajtjes Con Edison tha se një kamion që kaloi dyshohet se e ka zhvendosur kapakun e pusetës rreth 12 minuta para se zonja të mbërrinte dhe të parkonte në zonë.

Mendohet se prania e ujit shumë të nxehtë ose avullit brenda pusetës mund të ketë qenë faktor në vdekjen e Gocajt.

Donikë Gocaj, me origjinë nga Shkodra, ishte banore e Briarcliff Manor, fshat periferik në Qarkun Westchester të Nju Jorkut.