Futbollisti nga Vushtrria, Fatjon Bunjaku, ka humbur jetën në një aksident trafiku që ka ndodhur mbrëmjen e së shtunës, pak pas mesnate, në magjistralen Prishtinë-Mitrovicë.

Lajmi për vdekjen e tij u bë i ditur përmes një njoftimi në rrjetet sociale nga fshati Samadrexhë i komunës së Vushtrrisë. Në njoftim thuhet se Bunjaku ka ndërruar jetë tragjikisht si pasojë e aksidentit, ndërsa familjarët kanë bërë të ditur se për kohën dhe vendin e varrimit do të njoftojnë më vonë.

Për këtë humbje ka reaguar edhe kryetari i Federatës së Futbollit t? Kosovës, Agim Ademi, i cili e cilësoi vdekjen e Bunjakut si një humbje të madhe për familjen, komunitetin e futbollit dhe gjithë vendin.

“Fatkeqësisht që shkoi i ri. Ai ka qenë edhe futbollist i kombëtares dhe sigurisht që u ndiem shumë keq. Jo vetëm që ka qenë i kombëtares, por një futbollist i tillë, një djalë i ri që të shkojë tragjikisht është një humbje e madhe për familjen, për ne si komunitet i futbollit dhe për të gjithë popullin. Ngushëllime familjes dhe të gjithë komunitetit të futbollit për të. Na vjen shumë keq”, tha Ademi.

Gjatë karrierës së tij, Bunjaku veshi fanellat e disa skuadrave në Kosovë, Kroaci dhe Shqipëri. Ai hapat e parë në futbollin profesionist i bëri te Trepça.

KosovaPress