Të martën, ministri izraelit i Mbrojtjes, Israel Katz, njoftoi se ushtria izraelite ka vrarë gjatë natës Ali Larijanin, një nga zyrtarët më të lartë të sigurisë në Iran.

Po ashtu, ushtria tha se në të njëjtin sulm u vra Gjenerali Gholam Reza Soleimani, kreu i forcave paramilitare Basij të Gardës Revolucionare iraniane. Deri më tani, mediat zyrtare iraniane nuk e kanë konfirmuar vdekjen e tyre, raporton AP, përcjell KosovaPress.

Larijani, i lindur më 3 qershor 1958, ishte pjesë e një prej familjeve më të njohura politike në Iran dhe kishte shërbyer si kryetar i parlamentit nga 2008 deri në 2020. Ai gjithashtu kishte qenë këshilltar i Khameneit për strategjinë në bisedimet bërthamore me SHBA-të dhe sekretar i Këshillit të Lartë të Sigurisë Kombëtare të Iranit.

Në janar, ai ishte sanksionuar nga Thesari Amerikan për rolin e tij në shtypjen e protestave të brendshme, ku u vranë dhe u arrestuan mijëra qytetarë.

Katz tha se Larijani dhe komandanti i Basij u “eliminuan” dhe i bashkuan Khameneit në atë që ai e quajti “programi i shkatërrimit”.

Ky zhvillim vjen pas një periudhe tensioni të lartë në Lindjen e Mesme, pas sulmit të 28 shkurtit që vrau udhëheqësin suprem iranian Ali Khamenei dhe zyrtarë të tjerë të lartë.