Ushtria e Koresë së Jugut kërkon falje për rrëzimin e pasuksesshëm të dronëve të Koresë së Veriut
Ushtria e Koresë së Jugut kërkoi sot falje për operacionin e dështuar për rrëzimin e pesë dronëve të Koresë së Veriut që shkelën hapësirën ajrore të vendit të hënën.
"Na vjen keq që edhe pse ushtria jonë zbuloi dhe gjurmoi dronët, ne nuk ishim në gjendje t'i rrëzonim ata," tha në një deklaratë shefi i operacioneve të përbashkëta të Koresë së Jugut, gjenerallejtënant Kang Shinchul, raportoi Yonhap.
Ai vuri në dukje se ushtria ka probleme në zbulimin dhe rrëzimin e dronëve të vëzhgimit, ndërkohë që është ende në gjendje të kundërshtojë kërcënimet nga dronët më të mëdhenj.
Dje, pesë dronë të Koresë së Veriut fluturuan mbi vijën e demarkacionit ushtarak që ndan dy Koretë dhe njëri prej tyre fluturoi deri në pjesët veriore të Seulit.
Ndërkohë, ushtria e Koresë së Jugut është vënë sërish në gatishmëri pas shfaqjes së objekteve të paidentifikuara në rajonin veriperëndimor të vendit, jo shumë larg kufirit ndërkorean, që fillimisht mendohej se ishin drone.
Ushtria dërgoi avionë luftarakë për t'iu kundërvënë dronëve, por objektet rezultuan të ishin në të vërtetë një tufë zogjsh.
